PEMERI PERINTAH : Wan Junaidi mandangka midul Jasa Pahlawan Negara (JPN) ti deka diterima 10,000 iku raban ex-polis.
Midul nya diberi ngagai sida ke mandangka pemerani maya menua ke benung siga munya
KUCHING: Urung 1,000 iku orang pinchin polis nengeri tu deka nerima midul Jasa Pahlawan Negara (JPN) pengudah kabinet menteri ngemendar sereta dipesetuju Yang diPertuan Agong.
Sapit Menteri Dalam Menua Datuk Wan Junaidi Tuanku Jaafar madah midul nya diberi ngagai raban polis ke udah mandangka pemerani ba jeman menua siga suba lalu nya nyengkaum raban sedadu enggau orang ti udah mantu polis.
“Kabinet menteri udah ngemendar midul tu diberi ngagai raban polis ti udah mandangka pemerani maya ngenanka menua ke alai pemutus tu mega dipesetuju Agong.
“Jeman menua siga di Malaysia dibagi ngagai tiga renggat, iya nya maya keruga Azahari enggau munsuh komunis ari taun 1962 ngagai 1990 di Sarawak lalu keruga komunis dalam kandang timpuh 1948 – 1960 sereta 1969-1989 ba Semenanjung Malaysia,”ku iya.
Wan Junaidi mansutka penerang tu ba siti aum pengarang berita pengudah ngulu aum ti bejuraika pengawa nyuaka midul JPN ngagai raban bujang berani ex-polis di Mes Pemesai Pangkat Besai Indu Opis Polis Kontinjen, Jalai Badruddin ditu, kemari.
Iya netapka 10,000 iku raban ex-polis di serata Malaysia ti udah mandangka pemerani deka nerima midul nya ba renggat ti keterubah ke alai sida bisi penyampau 146,488 rintai nama ti deka dipansik.
“Ari penyampau nya, Sarawak bisi 1,000 iku penerima ungkup renggat ti keterubah tu lalu midul tu deka diagih lelubah nitihka renggat.
“Kitai nyadang mayuh agi raban ex-polis kelebih agi raban pejilin suba ti diau di menua pesisir deka nerima midul nya. Sida mengkang enda ulih digiga,”ku iya.
Ba kaul ke sama, Wan Junaidi mega netapka bala bini, anak tauka apai bujang berani ti udah midang tau nerima midul JPN nya.
Iya mega madahka nengeri tu udah diberi basa ngepunka pengawa ngelekat midul nya ngagai bujang berani ex-polis ke alai Tuai Pemegai Menua (TYT) Tun Salahuddin deka ngemujurka pengawa ba siti maya ti deka ditetap enda lama agi.
Ngenang jeman menua siga di Sarawak, iya madahka jeman nya berengkah maya keruga Azahari ba taun 1962 ke alai Balai Polis Limbang enggau Bekenu dirampas munsuh.
Ku iya, empat iku polis Konstabel Wan Jamaludin, Koperal Kim Huat, Konstabel Insol Chunggang enggau Konstabel Bujang Mohamad midang ngenanka Balai Polis Limbang kena 8 Disember 1962.
“Jeman menua siga di Sarawak udah nya disambung enggau konfrontasi kelimpah napi keruga munsuh komunis,”ku iya.
Bela datai Kepala Polis Sarawak Datuk Sabtu Osman.