TAUN BARU MAI TUAH: Pengaga empat iku indai tu ayan pengudah ngadaka anak ba taun 2014 tu di sepital Kapit ditu. Sepiak kiba nya Lempong Bit ke ngadaka anak indu pemerat 3.75 kg tumu pagi kemari.
KAPIT: Tiga iku anak mit, dua lelaki enggau seiku indu udah diadaka maya ke nyambut Taun Baru 2014 di Sepital Kapit ditu.
Anak mit keterubah endar diadaka Saini Anak Mudin, 21 taun ari Rumah Kilau, Sungai Tunoh, Baleh. Iya ngadaka anak indu ke ngembuan pemerat 2.6 kg, pukul 10:24 pagi.
Anak mit ti kedua diadaka Minah Anak Chua pukul 6:20 lemai, seiku anak mit lelaki ke ngembuan pemerat 2.85 kg ditangkanka enggau pengada anak mit lelaki ti ketiga ke ngembuan pemerat 2.45kg diadaka seiku indai ke benama Pidang Lengi Jing, pukul 10:53 malam.
Ketetiga indai enggau anak mit sida nya sama bela gerai magang sereta tau mulaika diri enda lama agi.
Seiku agi indai, Lempong Bit berasai gaga bendar ati laban pengingin iya ti deka ngadaka anak (2 Januari) taun baru tu dijapai pengudah iya ngadaka seiku anak indu pukul 6:19 pagi. Anak ke diadaka iya mega meh ke pemadu besai sereta ngembuan pemerat 3.75 kg.