BESAI RETI: Jabu (kiba) nyuaka chek ngagai Baling sereta peranak rumah panjai nya ke bukai.
BETONG: Penatai taun 2014 udah mai berita ke manah amat ngagai Rh Ming Dunggu, Nyelutong enggau Rh Baling Anggu, Penurin laban perintah menua udah ngemendarka ungkup belanja RM60,000 ngagai kededua buah rumah panjai nya ngambika bisi dikena nirika rumah panjai baru.
Rumah panjai Penurin ke udah didirika dalam kandang 50 menya, deka berubah gamal laban peranak rumah setuju deka ngaga rumah panjai baru laban rumah panjai lama sida majak repuk.
Tuai Rumah Baling Anggu, 61, madah, langkar rumah sida nya digaga ari kayu sereta udah majak repuk. Kelimpah ari nya, bisi sekeda peranak rumah panjai nya udah berengkah ngaga rumah sida ngena bata ngambika sebaka magang gamal dipeda.
“Bisi mega sekeda ke suntuk belanja, sida nadai belanja dikena meli perengka kena berumah. Berindik ari nya, kami sama setuju minta saup ari perintah ngaga rumah panjai nya baru.
“Bantu ti disediaka perintah tu dikena kami nembuka rumah panjai nya sereta meri gaya pengidup ke lantang agi ngagai semua peranak rumah panjai tu.
“Kami mega merambu ngaga rumah batu ngambika manah agi dipeda sereta baka gaya rumah panjai moden sereta mega ngemanahka kandang rumah ngena perengkaguna ke diberi perintah,” ku iya.
Berebak enggau nya, Tuai Rumah Ming Dunggu, 55, madah sida arapka taun 2014 tu, mai nasit ke manah ngagai peranak rumah panjai nya.
“Berita manah ke diterima kami seharitu tu bepun ari sukung kuat kami ngagai perintah ti meretika pemerinsa pengidup rayat.
“Bantu ke diberi perintah tu ulih nyaup ngelempungka tating belanja peranak rumah panjai tu ti nginginka rumah ke manah agi alai diau.
“Kami meri terima kasih ngagai perintah laban udah nyendiaka perengkaguna ngagai kami ditu,” ku iya seraya madahka sida mega nginjau duit ari Sekim Nginjau Duit Kena Ngaga Rumah Panjai.
“Aku nyadi tuai rumah, arapka peminta kami nya dikemendar ngambika kami ulih ngaga rumah panjai baru,” ku iya.
Sapit Kepala Mentari Datuk Patinggi Tan Sri Alfred Jabu madah, Sekim Duit Pinjau Kena Ngaga Rumah Panjai nya disediaka perintah nengah Opis Menteri Pengawa Berumah dikena ngemanah tauka nirika rumah panjai baru.
Nengah sekim nya mega, genap iku orang ke mujur minta duit jali nya deka diberi RM10,000 ngambika bisi dikena sida bebelika sereta nyikap perengka rumah bukai.
“Kami arap, barang sapa ti diau ba rumah panjai anang ngelepaska peluang tauka sekim tu, ngambika bisi nyadika penambah belanja dikena nembuka rumah sida.”
Iya bejaku munyi tu lebuh ngulu aum begulai enggau peranak kededua buah rumah panjai nya seraya nyuaka chek RM60,000 ungkup sesebuah Komiti Pemansang enggau Pengelikun Genturung Pendiau (JKKK) ba rest house perintah ditu ensanus.
Arapka ungkup belanja tu ulih nyaup ngelempungka tating pengidup peranak rumah panjai tu, sereta bisi dikena ngaga rumah panjai baru, ku iya.
Jabu ke mega Menteri Pemansang Menua Pesisir sereta Kaban Kunsil Nengeri Layar madah, ungkup belanja nya ke diberi nya semina pemun bantu ngagai peranak rumah panjai ba sitak iya.
“Kena ngepunka tu, kami deka milih rumah panjai ba kandang menua Betong, sereta nyendiaka bantau ke sebaka ngagai rumah panjai bukai,” ku iya.