Anda di sini

Segang pasang besai diumba terutu ujan lebat disadang ngampuhka sekeda kandang endur

Advertisement

KUCHING: Kandang endur ke baruh disadang ampuh bah sekali agi sehari tu pengudah Opis Pengemata Gaya Hari (Meteorologi) netapka hari deka ujan sereta ditambah segang ai pasang ti dipelaba manggai ba tikas pemadu tinggi 3.9 meter.

Nitih penerang ari seiku pemesai ba Opis nya, dalam timpuh seminggu ke deka datai berengkah ari Hari Empat kemari, mayuh kandang endur di serata nengeri tu deka diterutu ujan nyentuk ke Hari Tiga minggu baru.

“Meteorologi netapka ujan deka nurun enggau bangat ba mayuh kandang endur di nengeri tu dalam timpuh 7 hari ti  deka datai.

“Disegang ai pasang besai ti manggai ba ikas 3.9 meter sehari tu, kitai nyadang kandang endur ke baruh sekali agi deka ampuh bah,” ku iya lebuh dikerandau kemari.

Iya mega madahka musin tengkujuh disadang nyadi nyentuk ngagai bulan Mach taun tu.

Ai pasang besai nyadi ketegal fenomena bulan penuh ke alai penuduk bulan udah ba tikas ke pemadu semak enggau dunya kitai tu  ngujungka tarit graviti bulan mai pangka ke besai ba tikas ai di bumi.

Tikas ai pasang disadang manggai ba 3.8 enggau 3.9 meter dalam timpuh dua tiga hari tu.

Ba kaul ke sama, pemesai ari opis BOMBA madah, semua raban opis nya enda dikemendar pemisi berengkah ari 30 Disember 2013 nyentukka gaya hari majak manah.

Ku iya, raban BOMBA ke udah dulu pemisi diatu udah dikangau pulai kereja baru ngambika bela sedia napi sebarang penusah ke tau nyadi.

Taja pia, iya madah penusah bah ke disadang nyadi di nengeri tu enda kelalu ngirauka ati lalu nyadang bah ngenyit ba sekeda kandang endur serata Sarawak.

Opis BOMBA begulai enggau ejensi bukai baka ke JPAM deka seruran matau kandang endur di serata nengeri lebih agi ba kandang endur ke baruh lalu sedia bejalaika tanggung pengawa mindah orang tasah enti sebarang penusah nyadi, ku iya.

Advertisement