Anda di sini

BMS ngeluarka bup bacha dalam jaku Iban

SIBU: Borneo Media Solutions (BMS) anak kompeni Pegari Iban Production (PIP) diatu benung ngeluarka bup bacha dalam jaku Iban.

Kenyau ari ditengkebang belabuh bulan Jun 2013, BMS udah mujur ngeluarka tujuh bengkah bup bacha iya nya lima iti novel Iban lalu dua iti Gempung Ensera Nembiak.

Tuai Besai BMS Johnny Chuat maya dikerandau pengarang berita kemari madah, tuju BMS enggau PIP endang sama, iya nya ngemeratka pengawa ngeluarka bup bacha dalam jaku Iban.

“PIP tetap baka selama, ngeluarka majalah Pegari, majalah Senawah enggau bup-bup malin (Reference books) ke dikena bala nembiak ba UPSI, maktab-maktab enggau sekula-sekula perintah,” ku iya.

Iya madah, naka ke diatu, BMS udah bisi ngeluarka novel ‘Terutu Jemu Ambun Lemai’, ‘Puntan Pengerindu’, ‘Ai Ditetak Enda Putus’, ‘Kenang Pengerindu Tua’ enggau ‘Tekelambang Singkang’.

“Dua iti bup Gempung Ensera Nembiak iya nya Tusun 1 enggau Tusun 2 nya endang ensera-ensera nembiak Iban ti seruran ditusi sida ke tuai ari kelia baka ensera Jelu Nubai, Pelanduk seduai Tekura enggau mayuh agi.

“Bup tu chukup manah dibacha nembiak selampur umur nyengkaum kitai besai tuai mega dikena mulaika pengingat.

“Nambahka nya, bup ensera nya bisi diselitka gambar-gambar ilustrasyen,” ku iya sambil madahka bup tu bisi lapan iti tusun nangka ke diatu lalu tusun ketiga ngagai tusun kelapan deka dichelak enggau bererenggat.

Johnny madah, bup ke digaga ari baruh BMS tu asil karang ari penulis tebilang baka Jantan Umbat, Janang Ensiring, Pengajar Caroline Asing ari Sg. Sut, Kapit, Pengajar Richard Anak Changgan ari Julau enggau Howard Jilan ari Kuching.

Berebak enggau tu mega, ku Johnny, iya ngarapka mayuh agi kelebih agi bansa Iban rindu macha lalu besaup ngetanka jaku Iban enggaika retai ditelan jeman laban kediatu, bala nembiak kemayuh agi endang kurang nemu bejaku ngena jaku Iban baka nembiak-nembiak rumah panjai jeman kelia.

Bala mayuh ke bisi ati deka meli bup dikeluarka BMS tu tau ngelawa www: borneomedia2u.com tauka telefon ngagai lumur 013 575 5769.