Anda di sini

Ba hari keterubah 19 buah sekula ditutup ketegal penusah bah

Advertisement

KUCHING: Bisi 19 buah sekula di Sarawak ditutup pagi kemari ba hari keterubah (2 Januari) sesi sekula taun 2014 ketegal bah, taja pia muak ke lemai sekeda ari sekula nya dibuka pengudah ai ti surut.

Menteri Pengintu Pengelantang, Orang Indu enggau Pemansang Ruang Bilik Datuk Fatimah Abdullah madah, penyampau 19 sekula nya dirikutka naka pukul 10 pagi kemari.

“Penyampau semua sekula ti ditutup nitihka penerang ari Opis Pelajar Pelilih Mit Menua naka pukul 10 pagi 2 Januari, ngerikutka pemadu mayuh di Sibu bisi 12 sekula ditutup, lalu di Bintulu (1), Dalat (1), Meradong (1), Selangau (3) enggau di Subis (1).

“Di Sibu nya nyengkaum dua sekula sekondari iya nya SMK Kwong Hua enggau SMK Sg Merah, lalu kebukai nya sekula primary,” ku Fatimah madah ngagai Utusan Borneo kemari.

Opis Menteri iya sebengkah ari Ahli Jawatankuasa Pengurusan Bencana Negeri Sarawak (JPBN) ti bechairmanka Sapit Kepala Menteri Datuk Patinggi Tan Sri Alfred Jabu Numpang.

Gaya hari ti selalu ujan lalu ngujungka sekeda endur ti baruh dituntung penusah tasah bah nyengkaum sekeda jalai ngagai sekula.

Nitih ku pengari ari Opis Pelajar Nengeri Sarawak lebuh ditelefon kemari madahka kebuah sekula nya ditutup beduduk ari sekula enggau jalai ke sekula nya kena ampuh bah ngujungka putus penyambung.

Taja pia iya madahka, beberapa buah sekula ari 19 buah sekula ke ditutup pagi kemari udah ulih beoperasi beduduk ari ai udah surut.

Nitihka Laporan Pengoperasian Sekolah Yang Ditutup Sementara naka pukul 3 lemai kemari (2 Januari) Opis Pelajar Negeri Sarawak ngeriputka 13 buah sekula nyengkaum Harian enggau Asrama di bagi menua tauka pelilih mit menua di Sarawak agi ditutup sementara.

Bepelasarka statistik tauka riput naka pukul 3 lemai kemari (2 Januari) di Sibu sekula ke agi ditutup ketegal jalai ke sekula kena ampuh bah iya nya SK Jalan Deshon ti ngeruga pelajar 275 iku nembiak, SK Ng Bon 83 iku, SK Sg Menyan bisi 73 iku, SK Ulu Sg Sengan bisi 88 iku nembiak enggau SK Ng Assan bisi 117 iku.

Di pelilih mit menua Subis, SK Kpg Tegageng bisi 103 iku nembiak sereta SK Kpg Nyalau di Bintulu bisi 179 iku nembiak nitih riput naka pukul 3 lemai mengkang tejanggal ba pelajar.

“Di Selangau, naka pukul 3 lemai kemari tiga buah sekula primari mengkang ditutup ketegal jalai ngagai sekula enggau sekula nya ampuh, ti nyengkaum SK St Mark (M) ti bisi 62 iku nembiak, SK Nanga Selangau (305 iku nembiak) ti ampuh tikas punggung enggau SK Kuala Lemai bisi 44 iku nembiak.

Nambahka nya, bepelasarka penerang ari Opis Pelajar Nengeri Sarawak, SK Kampung KLID/Plajau ti bisi 149 iku nembiak enggau SK Metalun, Belaga ti bisi 81 iku nembiak mengkang ditutup naka pukul 3 lemai.

Kelimpah ari nya, nitih penerang ari Opis Pelajar Nengeri Sarawak, sekula ti ditutup nya deka bisi sesi sekula ganti ila.

Advertisement