PENGENTAP BARU: Rumah (RMR) ke beungkus RM95,000 tiap unit ba BRS nya.
KUCHING: Urung 1,500 iku peranak ari empat buah genturung pendiau ti kena bungkur Projek Tekat Ai Bengoh, Padawan disadang mindah bererenggat ngagai Palan Pengentap Pendiau Bengoh (BRS).
Kampung Taba Sait, Pain Bojong, Rejoi enggau Semban di Ulu Padawan deka ampuh ai enda lama agi lalu semua peranak ari empat genturung pendiau tu dipindah ngagai BRS di Jalai Semadang-Skio urung 50 KM ari mengeri Kuching.
Penyampau 204 buah Rumah Mesra Rakyat (RMR) digaga perintah nengah Opis Pengawa Berumah (HDC) ke alai empat bagi genturung pendiau ti nitihka nama kampung sida ke asal dipindah ke BRS.
Lima puluh lapan (58) buah rumah digaga ba Kpg Taba Sait, 47 ba Pain Rojong, 40 ba Rejoi sereta 59 ba Semban.
RMR ke beungkus RM95,000 tiap unit nya ngembuan 3 buah bilik tinduk sereta dua bilik mandi ke alai ungkus semua 204 buah rumah iya nya RM19,380,000.
Projek BRS dipun kenaka 1 Mac 2012 lalu udah tembu besereta OP (pemendar nguan) kena 5 Disember 2013.
Naka ke diatu, nitihka penerang ari komiti BRS Itodio Peu, kenyau ari pun bulan Disember tu tadi 39 pintu rumah di BRS udah diuan peranak ari Kampung Taba Sait, semilan pintu ari Kampung Semban lalu sepintu diuan peranak ari Kampung Rejoi.
“Taja pia, nadai seiku peranak ari Kampung Pain Bojong mindah kitu,” ku iya lebuh dikerandau bedau lama tu tadi.
Itodio ke mega Ketuai Kampung Taba Sait pechaya mayuh agi sida deka mindah ngagai palan pengentap pendiau Bengoh dalam awak ke semak tu.
Kena 20 Disember tu tadi, semua peranak ari empat buah genturung pendiau nya nerima cek bayar pampas rumah (lama) sereta surat pala tanah (lot rumah) enggau tanah kebun ke disua Menteri Muda Pengatur Pemansang enggau Pengeraja Asal datuk Naroden Majais.
Penyampau RM8.1 juta diagih ungkup pengawa mayar pampas rumah semua 204 ruang bilik peranak ke kena bungkur.
Sehari udah nya (21 Disember), sida (52 iku) mega nerima kunchi RMR ari Menteri Pengawa Berumah Datuk Amar Abang Johari Tun Abang Openg Balai Guna Mensia Mayuh Kpg Taba Sa’it.
Ngemantup ati semua sida ti mindah ngagai BRS, Peu ke nyadi pengari madah sebuah sekula primari patut ditumbuhka ba BRS.
Ku iya, sekula nya deka ngemudah bala anak ari empat buah genturung pendiau nya nampung pelajar sida.
“Kami keran deka meda sebuah sekula primari ditumbuh ba BRS lalu ukai ba endur bukai luar ari BRS,” ku iya.
Lima puluh dua ruang bilik ke nerima kunchi RMR kena 21 Disember tu tadi deka ngintu Krismas sida ti keterubah ba rumah baru di BRS.
Taja pia, 90 buah ruang bilik mengkang enggai mindah ari kampung asal sida iya nya 35 ari Kpg Taba Sait, 21 ari Pain Bojong sereta 34 ari Rejoi.
Tekat Ai Bengoh digaga ngena ungkup belanja RM315 juta.