MERARAU: Adenan lebuh datai ba Pengerami Merarau The Borneo Post/Utusan Borneo, ke sama digulu Lau (belakang Adenan kiba).
KUCHING: Surat berita ukai semina nyadi kereban ke dibacha tang tau mai pemansang ngagai mensia mayuh, ku Menteri Ba Opis Kepala Menteri (Pekara Khas) Tan Sri Datuk Amar Adenan Satem.
Berindik ari nya, iya minta tetiap surat berita ngarang tauka nulis mayuh agi isu ke bekaul enggau pendiau mensia mayuh di menua tu.
Iya madah pengawa tu beguna bendar ngambika surat berita majak nerima sambut ari mensia mayuh taja pan udah bisi blog berita baka kediatu.
“Dunya diatu majak maju tang aku mengkang macha surat berita, ninting hari.
“Enti sehari aku enda macha surat berita, berasai puang pendiau pengidup aku,” ku iya madah lebuh bejaku ba Pengerami Merarau enggau meri tanda basa ngagai raban pemberita enggau pengarang berita The Borneo Post enggau Utusan Borneo ditu, bedau lama ke udah.
Iya madah, pengemeran media patut seruran neritka kaul sida enggau perintah ngambika pemadah ke dikenataika ngagai mensia mayuh enda ditempa sengapa.
Sebedau nya, Kepala Pemesai Eksekutif (CEO) gerempung See Hua Dato Henry Lau muji pengawa ke digaga pengereja pengawa The Borneo Post enggau Utusan Borneo ke udah bebendar gawa ngarang berita sida kena narit ati mensia mayuh.
“Aku ngarapka ulah bagas gawa baka tu, deka majak dikereja kita kelimpah ari ngiga sereta ngarang berita enggau chara ke adil sereta betul,” ku iya.
Iya mega minta mayuh agi berita dikarang bekaul enggau pekara pelajar, pengawa rama enggau pengarap ngambika penemu mensia mayuh pan ulih dikerembaika.
Ba jaku Pengarang Urusan Kanan The Borneo Post enggau Utusan Borneo Francis Chan madah, penyampau surat berita The Borneo Post ungkup taun 2012 manggai 93,273 iti lalu Utusan Borneo manggai 50,179.
“Tu mandangka kededua surat berita tu udah majak nambah sereta dipilih mensia mayuh di Borneo,” ku iya.
Iya nambah, Gelar Shell Kenyalang 2013 mega beratika The Borneo Post enggau Utusan Borneo mujur teulihka 13 ari 21 gelar ke dipekitka.
Ba pengerami nya mega bisi diatur pengawa nyuaka insentif ngagai pemenang gelar enggau pengarang berita kededua surat berita nya.
Sama bisi ngulu pengawa nya, Datin Sri Wong Suk Ting enggau Menijer Operasi Besai The Borneo Post enggau Utusan Borneo Phyllis Wong.