NANGGAM PENGERINDU: Burung Kenyalang ke dikemegah Nengeri Sarawak, Jimmy (kiba) enggau Juliet di Kem Piasau Miri, nanggam pengerindu begulai.
NGELALA TANGGUNGPENGAWA: Jimmy mai pemakai ninting hari ngagai bini iya, Faridah ke benung meram telu pengelama entara 90 ngagai 115 hari.
PALAN BESARANG: Gambar mandangka penuduk 3 buah palan endur burung Kenyalang besarang di Kem Piasau Miri. Penyauh sama bela iya nya urung 650 meter ari tiap sarang.
KUCHING: Kenyau taun 2005, maya keterubah sarang burung Kenyalang Jimmy enggau Faridah ditemu nyentuk ke bulan Ogos 2013, Faridah udah betelu sereta mechahka telu tiap lapan bulan ke alai bulan Ogos nya nyadi peturun iya ke lapan.
Di Kem Piasau, tiga sarang burung kenyalang bisi ditemu iya nya besemak rumah diau Shell lumur 58, 98 enggau 238 urung 650 meter penyauh tiap sarang.
Sarang ba rumah lumur 58 diempu Jimmy enggau Faridah (Juliet diatu) urung 2 meter peninggi ari tanah, lumur 98 mali tanah lalu ba lumur 238 urung 10 meter peninggi ari tanah.
Pengawa masang sistem pematau enggau ngempuru data ke diadu Chairman Persatuan Alam Malaysia (MNS) pampang Miri, Musa Musbah diatu digaga ba rumah lumur 58, rumah ke diserah Shell Berhad ngagai iya.
Nitihka penerang ari Musa, maya semak ka betelu, burung Kenyalang indu (Faridah) deka tama ke dalam lubang sarang ti umbas iya pemesai ke alai pengudah iya tama, lubang nya lalu deka ditutup Jimmy enggau tanah diselampurngena ai liur iya ngambika lekat.
“Semina mit aja lubang sarang mengkang dipeda lalu nya digaga pia ngambika mudah endur Jimmy nyapi Faridah tauka Juliet enggau pemakai.
“Kebuah Kenyalang ngelaka lubang nya mit ngambika jelu bukai baka ular tauka tupai enda ulih tama lalu ngachau telu sereta indu burung Kenyalang ba dalam sarang.
“Indu burung Kenyalang, baka kes Faridah deka diau ba dalam sarang, betelu sereta ngeram dalam timpuh entara 90 ngagai 115 hari ke alai semua pemakai deka dianjung tauka disapi laki burung (Jimmy),” ku Musa lebuh dikerandau ba Kem Piasau bedau lama tu tadi.
Musa mega madahka Jimmy deka nganjung pemakai ngagai Faridah ke ba dalam sarang enda kurang ari 15 kali sehari berengkah ari pagi nyentuk ke jauh lemai lalu Jimmy deka nentuka sarang nya likun 24 jam ke alai maya malam iya deka tinduk enda jauh ari sarang seduai.
Entara pemakai ke dikerindu burung tu iya nya igi buah sawit, anak burung bukai, tekuyung, tichak, telu burung bukai enggau sekeda utai idup ke mit.
Nitihka penerang ari Musa, burung Kenyalang jarang betelu mayuh, semina dua igi lalu nya meh ti deka dipechah lalu diintu manah indu burung nya nyentukka anak iya ulih terebai.
Ku Musa, pengudah anak burung chukup besai ba dalam sarang, Faridah deka nguji mechahka sarang ti dialit enggau tanah. Nengah saup Jimmy ba luar sarang lalu ditambah enggau tempuh ai ujan, sarang nya ulih pechah lalu anak ke baru nemu terbai deka pansut ari sarang.
Sebedau Faridah ditangkap sereta dibunuh kena 24 September tu tadi, enam iku purih iya suah dipeda di Kem Piasau ditu lalu iya ke bukai enda dipeda.
“Berindik enggau nya, kami pechaya anak burung Jimmy enggau Faridah ke bukai udah ditangkap orang ke enda beradat ti enda mereti sereta bebasa ka undang-undang,” ku Musa.
Pengudah pemati Faridah, perintah nengeri enggau lengkas deka ngizit Kem Piasau nyadi palan rizab menua ke alai pekara tu mega udah matak runding Kepala Menteri Pehin Sri Abdul Taib Mahmud ti bela ngansak pemutus nya digaga enggau lengkas.
Pansik netapka Kem Piasau nyadi palan rizab benung ransing dipejalai lalu diatu benung nganti proses ngulihka penemu ari semua orang.
Ba sebengkah pengawa ti diatur ba kem nya bedau lama tu tadi, Menteri Muda Rampa Menua Datu Len Talif Salleh madah perintah nadai nerima sebarang bantah mutuska Kem Piasau nyadi palan rizab menua.
“Kitai ngembuan mayuh penerang senentang kandang endur tu tang kitai patut nemu pengawa ngizit nyadi palan rizab menua begunaka timpuh ti panjai.
“Ba runding aku, nadai sebarang bantah diterima enti kitai mutuska Kem Piasau nyadi rizab menua, engka ulih diputus ba pengujung taun tu tauka tumu agi ari nya,” ku Len.
Ari tinjau Utusan Borneo bedau lama tu tadi, Juliet disadang udah tama ba dalam sarang maya ke diatu lalu iya disadang deka ngadaka anak iya ti keterubah begulai enggau Jimmy ba bulan Februari 2014.
Cherita baka ni Jimmy ke nyadi burung kenyalang ti keterubah datai ba Kem Piasau mengkang enda diserungkai. Bisi madah iya dibai seiku orang putih (orang gawa Shell Berhad) ti nemuai ngagai menua Ulu lalu diinang ba kem Piasau…?? Tauka Jimmy temu ngenataika diri ngagai kem nya…??
Ketegal ti ngembuan kuasa ngumbai ke alai kumbai kenyalang ulih didinga burung kenyalang bukai tajapan beribu batu jauh, Faridah datai lalu ngerembaika purih seduai di kem nya.
Diatu, pengudah pemati Faridah, Juliet deka nentuka Jimmy enda sunyi, kem Piasau enda sunyi, peranak Miri enda sunyi lalu ngemesaika kenyalang ke nyadi simbol kemegah Nengeri Sarawak.