MANDANGKA PENYIRU: Burung Kenyalang, Jimmy (atas) enggau Juliet (baruh) dipeda benung ngemanah sarang seduai di Kem Piasau Miri.
NAMA PENYALAH FARIDAH?: Gambar mandangka saspek ke munuh burung Kenyalang benama Faridah ditangkap di Kem Piasau Miri.
KUCHING: Berita pemati ikon Kem Piasau di Miri, seiku burung Kenyalang ke beri nama Faridah balat ngeringat peranak nengeri Sarawak ke alai semua 2,000 kaban Facebook ti nitihka pengidup burung nya begulai enggau tawing iya (Jimmy) bela ngenataika penyinu ati.
Faridah ditangkap lalu dibunuh di Piasau Garden kena 24 September 2013 urung pukul 12:30 tengahari.
Saspek udah munuh seiku burung kenyalang peturun ‘Oriental Pied’ tauka nama saintifik Anthracoceros albirostris ti dijaga nengah Ordinan Perlindungan Hidupan Liar 1998, enda minta pemendar betulis ari Kontroler Opis Jelu Siga Nengeri Sarawak.
Pengudah penusah nyadi, polis bisi ngenan saspek lalu asil pansik mandangka sapek udah ngereja penyalah lalu tau diukum jil tiga bulan enggau ukum mata duit penyampau RM2,000 tauka jil tiga bulan agi enti enda mayar ukum.
Saspek, Micheal Rabai,20, ari Permy Jaya, Miri ngakun ngereja penyalah nitihka tuduh nengah Seksyen 29 (1) Ordinan Perlindungan Hidupan Liar 1998 lalu diukum nengah Seksyen 29 (1) (c) akta ke sama ti mai ukum penjara pengambis lama dua taun enggau ukum RM25,000.
Majistret Mohamad Redza Azhar Rezali ngeletak ukum berengkah 31 Oktober 2013, jil pengelama enam bulan pengudah orang salah enda tebayar ukum sereta pengudah mendingka jaku ngakun salah ari saspek.
Sebulan pengudah ditinggalka Faridah mati, Jimmy dipeda begulai manah enggau tawing baru iya Juliet.
Juliet disadang deka betelu dalam awak ke semak ke alai seduai udah berengkah dipeda ngemanah sarang ba pun bulan November tu tadi di Kem Piasau Miri.
Chairman MNS Persatuan Alam Malaysia (MNS) pampang Miri Musa Musbah lebuh dikerandau di Kem Piasau bedau lama tu tadi madah pemanah pendiau ti dipandangka Jimmy enggau Juliet nya sigi enda disadang.
Berindik enggau nya, dikena nentuka pengelikun seduai, sebengkah sistem pematau data sereta video disikap ba mua sarang burung nya.
Nitihka penerang ari Musa, video nya deka meri data ke silik ngambika tau dikena ngadu pansik jemah kelebih agi ba pengawa matau penyampau burung kenyalang di kem nya kelimpah dikena ngintu pemaik enggau pengelikun burung nya.
“Atur masang video ba mua sarang Jimmy enggau Juliet digaga nengah chara manual lalu udah diganti ngagai sistem pematau online ngambika ulih dipatau 24 jam.
“Nengah rikod ke dikembuan, kitai nyadang ulih nemu pusin pengidup burung kenyalang nyengkaum proses ngulihka tawing enggau chara nyendiakka sarang.
“Data senentang pengidup kededua burung tu chukup beguna lalu deka dikena raban pemansik sereta nembiak sekula meretika pengidup peturun burung tu jemah,” ku iya.
Musa ke mega seiku Ranger Hidupan Liar Kehormat Sarawak Forestry Corporation (SFC) madah Juliet ulih ngada mayuh burung kenyalang di Kem Piasau enti enda dikachau mensia tauka jelu bukai.
Nitihka rikut, Indai kenyalang ke dulu (Faridah) udah ngadaka 56 iku anak burung kenyalang kenyau ari taun 2005 lalu tebal agi anak iya mati ketegal dibunuh sekeda orang ke enda beradat.
Rikut mega mandangka burung kenyalang keterubah datai di kem Piasau ba taun 2004 iya nya Jimmy ke alai kandang endur kem nya ngembuan mayuh macham pun kayu sereta pemakai ti dikerindu burung kenyalang.
Data senentang burung kenyalang di Kem Piasau berengkah dirikut Dr Gianna Minton ba taun 2005, laki iya seiku pemesai Shell ke diau di kem nya.
Ketegal ti ngembuan mayuh awak lepa, Dr Gianna rindu beratika pengidup burung (Jimmy enggau Faridah) lalu berengkah ngerikut data.
“Iya ke amat, aku nampung pansik ti udah diadu Dr Gianna.
“Maya Dr Gianna tetemuka Jimmy, burung nya bedau diberi nama lalu pengudah Dr Gianna nyerahka semua penerang senentang burung tu aku lalu meri iya nama Jimmy sereta pia mega enggau Faridah,” ku Musa.
Musa berengkah bejalaika pansik enggau silik senentang burung kenyalang di kem Piasau pengudah iya pinchin ari Shell Berhad ba bulan Ogos 2012.
Shell nyerahka sebuah rumah ba Kem Piasau besemak enggau sarang burung kenyalang ngagai Musa ngambika mudah endur iya matau pengidup Jimmy enggau Faridah (maya nya), diatu enggau Juliet.
Ditanya senentang kus masang semua sistem, Musa ke mega mandal chairman Piasau Camp Nature Society (PCNPS) madah semua nya dipelanja ari puket iya empu ketegal ti kelalu rinduka pengidup bansa burung kenyalang nya.
Tajapan kus enda kelalu besai, MNS enggau PCNPS mengkang begunaka spunsa ari gerempung tauka orang bukai ngambika pengawa ngadu sistem pematau ulih dipejalai enggau lanchar.
KENA MATAU 24 JAM: Kededua Jimmy enggau Juliet bediri ba tiang endur masang video dikena matau seduai 24 jam.