MERI PENYENANG: Manyin (dua kiba) sereta disempulang pemesai bukai ba palan pemeresi ai nya, bedau lama tu tadi.
KUCHING: Palan Pemeresi Ai Slabi ti ulih ngemekalka 50 juta liter ai beresi sehari deka nentuka 50 peratus genturung pendiau di pelilih Serian enda suntuk bekal ai pengudah palan nya tembu digaga ba bulan April tu tadi.
Digaga nengah ungkus RM116 juta, palan nya deka meri penyamai sereta pengelantang ngagai 10,000 peranak di genturung pendiau Tebedu, Mongkos, Bukar, Mentung Merau, Tebakang, Kedup sereta sekeda kandang endur ngelingi Serian.
Projek ke nerima belanja ari perintah besai nya mega bisi ngagihka RM90 juta ungkup pengawa masang paip baru ngagai sekeda kandang endur ti udah ditetap.
Setipak enggau juluk perintah nengeri ti deka meda tiap kandang endur di nengeri tu disikap enggau perengka guna baka ke jalai alun, bekal lekterik enggau ai dalam timpuh 10 taun ke deka datai, fasa kedua projek bekal ai di Serian jemah deka nentuka semua genturung pendiau nerima bekal ai beresi.
Ba pengawa bejadi Palan Pemeresi Ai Slabi bedau lama tu tadi, Menteri Pemansang Infrastruktur enggau Penyambung Dato Sri Michael Manyin madahka fasa II projek bekal ai di Serian disadang berengkah dalam awak ke semak.
Ku iya, semua perambu enggau penyampau belanja ungkup fasa II nya udah dikira Opis Kereja Raya (JKR) lalu benung nganti agih belanja ari perintah besai.
“Fasa II tu deka mungkur pengawa mekal ai beresi ari Balai Ringin nyentukka Pantu sepemanjai 48 KM.
“Nitihka perambu JKR, fasa II begunaka belanja RM105 juta lalu enti duit tu ti beri perintah besai, projek tu deka berengkah dikereja.
“Fasa II disadang digaga dalam timpuh 3 ngagai 5 taun nitihka pengelengkas perintah besai ngagihka belanja. Tembu ila (fasa II), 100 persin kandang endur di pelilih Serian deka nerima bekal ai beresi,” ku iya.
Palan Pemeresi Ai Slabi disadang ulih mekal ai beresi nyentuk ngagai taun 2025. Ditambah enggau palan mekal ai ke lama di Serian ti ulih mekal 25 juta liter ai sehari, pelilih nya diatu nerima bekal ai beresi ba penyampau 75 juta liter sehari.
Palan ke digaga nengah Atur Pemansang Malaysia Lumpar ke-10 dipun ba taun 2010 lalu tembu kenaka 7 April 2013 sereta udah bejalaika operasyen.
Bela datai Direktor JKR Sarawak Ir. Zuraimee Sabri, Sapit Direktor JKR Daniel Ranggu enggau Rumai Galis, bala tuai raban bansa enggau orang bukai.