Anda di sini

Chakah gawa, ngangkatka kualiti servis pekara ti dikemeratka MBKS ba taun 2014

Advertisement

KUCHING: Chakah bejalaika pengawa enggau ngangkatka agi kualiti servis ngagai mensia mayuh ke mayar chukai antara pekara ti chukup dikemeran sereta dikemeratka Majlis Bandaraya Kuching Selatan (MBKS) ba taun 2014.

Datuk Bandar MBKS, Datuk James Chan lebuh bejaku ba pengerami ‘MBKS SOREKA Club Year-End Countdown Dinner’ ngelalau pengereja pengawa bejalaika kereja enggau besemekih nengah chara engkeman.

Iya minta semua pengereja pengawa MBKS gaga ati sereta ngembuan pengelurus maya bejalaika pengawa ngambika meri servis engkeman ngagai mensia mayuh ke datai ngagai opis MBKS.

“Ba taun 2014, semua kitai (pengereja pengawa) MBKS enda tau enda ngangkatka agi kualiti servis ngagai mensia mayuh ke mayar chukai.

“Sida ke mayar chukai mesti deka ngasaika sida amat diterima ba opis kitai nengah pengawa kitai ke meri servis ti ngemeranka basa, ulah bebakih sereta nulung orang.

“Enti MBKS ulih meri servis ba tikas tinggi baka tu, udah tentu sida ke mayar chukai deka ngumbai kitai No.1 City Council ba Malaysia,” ku iya ba pengerami ti diatur di Balai Raban Bansa MBKS ditu malam ensanus.

Bejaku baru Chan madah, deka datai ba tikas tauka setindit nya (lumur satu) beguna pemagas bejalaika pengawa.

Juluk MBKS ti bendar ku iya, endang deka meri servis ngagai mensia mayuh sereta ngelindung lalu nyaga pekara ti beguna ba mensia mayuh

Nya alai semua pengereja pengawa patut ulih gawa begulai enggau manah dikena napi pengawa enggau setindit nya, ku iya.

“Kitai mesti ngembuan penemu enggau runding ti meruan deka belajar, ngangkatka diri lalu belajarka pengelandik baru.

“Lebih beguna agi, kitai mesti inovatif sereta mansutka pemanah baru.

“Kitai mesti bepikir di luar kutak, lalu ulih meda pekara ti nadai sebedau tu sereta nanya ‘nama kebuah nadai’,” ku iya.

Sama bisi datai ngagai pengerami nya malam ensanus, bini Chan, Datin Cathrine Sng, Presiden Kelab SOREKA Jumaidi Ahmad, Chairman Pengatur MBKS Soreka Club Annual Dinner and Dance Andrew Tiong sereta  temuai dipebasa bukai enggau kaban kelab ti mai diri sebilik.

Advertisement