KELAI BASA: Gramong (dua ari kiba) nerima tepa ari Brenden seraya dikemataka bala bukai sepengudah bejadika Hari Krismas di Kanowit, empai lama tu tadi.
Peranak menua pesisir dilalau enda tekait ati enggau semaya puang penyakal
KANOWIT: Juluk ati parti penyakal nguji mai politik sida ngagai menua pesisir nyengkaum ba pelilih Kanowit disema baka mimpi ke enda nyadi nyata.
Menteri Muda Pemansang Tanah Datuk Gramong Juna madah, peranak menua pesisir enda patut kena panjuk tauka tekait ati enggau semaya puang penyakal ke endang semina beambi ulih ungkup penguntung politik diri empu aja.
“Aku udah begulai enggau Barisan Nasional (BN) lebih 20 taun ke udah tang empai meda pemansang ke diatur penyakal nyengkaum di Kanowit ditu,” ku iya madah ba pengerami makai lemai Krismas ke diatur Pampang Raban Indu enggau Nembiak Parti Pesaka Bumiputera Bersatu (PBB) N.44 Machan ditu, empai lama tu tadi.
Gramong ti mega Kaban Kunsil Nengeri (ADUN) Machan madah, peranak menua pesisir sigi patut ngenggaika juluk ati parti penyakal ti deka ngerembaika politik sida ngagai menua pesisir.
“Chara idup kitai di menua pesisir enda ulih disebakaka enggau pengidup orang di mengeri baka di Kuching, Sibu enggau Miri,” ku iya.
Bekenangka pengerami ke diatur lemai nya, Gramong meri puji ngagai komiti pengatur laban udah mujur ngatur pengerami nya.
Ku iya, pemujur tu ngayanka ulah deka begulai enggau pangan diri kelimpah besepenemu sereta ngembuan ulah bekerejasama.
“Aku mega pechaya Pampang Raban Indu PBB N.44 Machan udah ngayanka pengeransing sida,” ku iya sambil ngarapka pengerami nya ulih nyintalka kaul enggau pangan diri sereta rayat ke bukai.
Chairman komiti, Brendan Dominic maya bejaku madah, sida meri besai terima kasih ngagai Gramong laban udah magi awak bejadika pengerami ti keterubah iya diatur sida.
Iya mega meri basa ngagai bala raban PBB ari Katibas, Meluan, Pakan, Tamin enggau Sibu laban ulih datai ngulu pengerami lemai nya.
Pengerami lemai nya disempulang enggau pengawa ngajat Sape ari Stephen Jok, lagu Krismas, betanda enggau mayuh program ke bukai.
Bela bisi ngenataika diri maya pengerami tu iya nya Sekretari Politik Kepala Menteri Maurice Giri, Datin Catherine Gramong, Pemancha Spancer Kudang, Pemancha Chia Chau Fah enggau bala ke bukai.