SIBU: Parti Reformasi Sarawak (STAR) udah mutus nganjung tiga iku chalun sida bediri ba Pengawa Bepilih Besai Ke-14 (PRU14) ti deka datai.
Sida tu iya nya Sai Melaka bediri ba Parlimen Kapit, Tiong Ing Tung (Parlimen Sibu) enggau Chieng Lea Phing (Parlimen Bintulu).
Nama sida tiga digerah Presiden STAR Lina Soo maya aum media ba sebuah hotel ditu, sehari tu.
Taja pan baka nya semina Sai enggau Tiong aja bisi datai maya tu.
Lina madah, nama Chieng sekali agi deka dipadahka enda lama agi.
Kelimpah sida tiga, STAR mega deka mantaika nama siku agi chalun sida bediri ba Parlimen Puncak Borneo nangkan ke tu.
Tang Lina maya tu empai madah nama chalun sida ti bediri dia.
Maya tu mega iya madahka diri enda bediri ba PRU14.