KUCHING: Perintah nengeri ngemendarka belanja dikena ngemujurka perambu projek ngaga tebing ai ba Batu Kawa.
Kepala Menteri Datuk Patinggi Abang Johari Tun Openg madahka, perambu ngaga tebing ai nya dikearap ulih nyendiaka palan endur ngelantang diri lebih agi ngagai mensia mayuh ke diau ba kandang menua nya.
"Datuk Dr Sim Kui Hian (Menteri Kaunsil Kandang Menua enggau Pengawa Berumah ti mega chalon BN sitak Stampin) minta digaga tebing ai ba Batu Kawa.
"Aku ngemendarka RM5 juta dikena ngaga tebing ai ba Batu Kawa.
"Tu ulih endar mensia mayuh bejalai ngelantangka diri, Tai chi, poco-poco sereta ke bukai ngambika bepengerai," ku iya seraya nerima tempik ari mensia mayuh ke ngulu pengerami nya.
Abang Johari mansutka pekara nya lebuh bejaku nyerumba bejadika Projek Pembangunan Lembangan Sungai Bersepadu (PLSB), ti diatur Opis Menteri Pengeraja Asal enggau Rampa Menua ba Dataran MJC, Batu Kawa ditu, sehari tu.
"Enti bepengerai, untak kitai regas nya baru kitai deka bulih penemu baru," ku iya.
Dulu ari nya, Dr Sim dalam jaku pengelalu pengerami nya bisi minta ba Batu Kawa disediaka palan ngelantang diri baka rekreasi ke guna mensia mayuh ba endur nya.
Iya madahka kandang menua nya begunaka endur baka palan ngelantang diri sereta dipelabaka beguna belanja urung RM5 juta.