Anda di sini

Pemutus PRS tetap dipebasa: Abang Jo

Advertisement
 Abang Johari dikerandau pegarang berita di Kuching kemari.
PEMUTUS DIPEBASA: Abang Johari dikerandau pegarang berita di Kuching kemari.

KUCHING: Pemutus Parti Rakyat Sarawak (PRS) ningkilka lima iku kaban kunsil besai parti nyengkaum Sapit Presiden Datuk Joseph Entulu tetap dipebasa, ku Kepala Menteri Datuk Patinggi Abang Johari Tun Openg.

Kelimpah ari nya, Abang Johari ke mega Chairman Barisan Nasional (BN) Sarawak netapka sida lima ke ditingkil PRS malam ensanus nya sigi enda diterima masuk Parti Pesaka Bumiputera Bersatu(PBB).

“Sigi enda...kitai (PBB) enda nerima sida lima,’ku iya pengudah tembu Pengerami Konvokesyen Universiti Teknologi Swinburne di Palan Aum Borneo Kuching (BCCK) ditu, kemari.

Nyaut tanya bukai ari pemberita, Abang Johari nyangkal tuduh diak sekeda orang ke dikumbai ‘big brother’ bisi nyukung Entulu nyadi chalun di Selangau lalu keran ngubah rintai nama chalun PRS ke dianjung presiden parti nya.

Nyaut tanya bukai ari pengarang berita, Abang Johari nyangkal tuduh sekeda orang ke dikumbai ‘big brother’ bisi ngubah rintai nama chalun PRS ke dianjung presiden parti nya.

“Tuduh nya semina spekulasyen aja, serak tu kitai napi pengawa bepilih parlimen lalu pemutus ba rintai nama chalun digaga Menteri Besai,’ku iya.

Abang Johari mega madah rintai chalun ngarika BN Sarawak ungkup Pengawa Bepilih Besai ke-14 (PRU14) deka dibantai ila (sehari tu) jam 9 pagi di Kuching.

Ba aum, ngenyit Kaunsil Besai PRS malam ensanus, Komiti ‘Khas’ PRS netapka sida lima ngelanggar penetap parti lalu ditingkil tekala nya nengah Genteran 8(22)(m)(i) Konstitusyen PRS.

Presiden PRS Tan Sri James Masing madah, Entulu ke mega Menteri ba Opis Menteri Besai enggau penyandang sitak parlimen Selangau enda bebasaka pemutus parti ti enda milih iya bediri ngenanka penuduk.

Ku Masing, Entulu enggau nyata madah ngagai bala mayuh iya mengkang chalun di Selangau tajapan PRS udah milih Rita Insol.

“Ulah sida lima tu mandangka sida enda bebasaka parti ba sentang chalun ke udah dipilih ngarika parti ungkup PRU14 sereta udah ngujungka parti balat dikelesei,’ku Masing ba aum pengarang berita pengudah aum ngenyit nya.

Kelimpah Entulu, empat ke bukai ke ditingkil iya nya Datuk William Nyallau Badak ke nyadi penyandang sitak Parlimen Lubok Antu, Nyempah Sabut, Adriana Chumang enggau Edward Kurik.

Ba sentang penyalah sida empat, Masing ke mega Sapit Kepala Menteri madahka sida ditemu ngeruga penyerakup dalam parti nengah chara nyukung Entulu.

Ba aum pengarang berita nya mega Masing madah, surat ti madahka sida udah ditingkilka ari parti deka dianjung malam nya mega.

‘Pengudah ditingkil, Entulu enggau Nyallau tau bediri nyadi chalun ngatika diri, tang seduai enda deka bediri nengah chalun terus BN,” ku Masing enggau nyemetak.

Dulu agi ari tu, Masing suah madahka Rinta Insol deka nyadi chalun baru di Selangau lalu Robert Pasang Alam di Lubok Antu.

  • oleh
  • Advertisement