KUCHING: Menteri di Opis Menteri Besai, Datuk Joseph Entulu Belaun, penyandang penuduk Parlimen Lubok Antu Datuk William Nyalau Badak enggau tiga iku kaban kaunsil tetinggi parti, Nyempah Sabot, Adriana Chumang Nyambong enggau Edward Kurik dipinta nyemilik Parti Bansa Dayak Sarawak Baru (PBDS Baru) kemari.
Pinta nya dibantai pengudah kelelima kaban kaunsil ditingkil ari nyadi kaban partiudah bekau Presiden Parti Parti Rakyat Sarawak (PRS), Tan Sri James Jemut Masing mansutka jaku ba mua mayuh ari, nyau jauh lemai kemari.
Nitih ku Direktor Pengawa Bepilih PBDS Baru Rapelson Richard Hamit, Masing udah munuh demokrasi enggau penyerakup dalam parti baka ti dikereja iya sebedau tu (Rapelson nikalka nya ngagai PBDS ti nadai guna agi diatu).
“Sida ti kering enda ngelabuhka orang di baruh. Kitai bela ngangkatka sida. Pekara ti digaga iya (Masing) ngagai sida enda ulih diterima, tambah mega iya begelar siku ketuai.
“Iya udah munuh demokrasi enggau penyerakup dalam parti baka ti udah digaga iya sebedau tu (Rapelson nikalka nya ngagai PBDS ti nadai guna agi diatu).
“Sejarah nyadi baru, Masing melakangka bansa Dayak ke pemaik iya empu,” ku iya dalam sebengkah penerang dikeluarka sida kemari.
Iya ke mega Ketuai Nembiak PBDS Baru, nyemetak madahka PBDS Baru nyadi parti diempu kaban parti, ukai baka PRS Masing.
Kaban Kaunsil Tetinggi PBDS Baru udah sepenemu setuju nerima sida lima ti udah ditingkil ngambi nyemilik parti.
“Nyallau enggau Entulu patut ninggalka pengelantang seduai din lalu nyemilik PBDS Baru laban sebedau tu mega sida nyadi kaban lama PBDS ti nadai guna agi diatu.
“Kitai tu ruang bilik Dayak, nadai orang deka ditingkil tauka dibuai ari parti ketegal nyebut pengamat. Tu hak demokrasi tetiap iku rayat, ku Rapelson nyemetak.
Iya mega madahka penetap diri ba penerang Ketuai Nembiak PRS, Datuk Snowdan Lawan ti dikumbai iya bejaku ngapa laban ngaga parti baka sebuah kompeni peribit, penuduk Presiden bepelasarka undi baka chalun ti bediri bulih undi ari rayat nyadi Kaban Parlimen tauka ADUN, Masing nyadi Presiden ketegal bala kaban iya.
Rapelson tekenyit enggau penerang Snowdan ti nyemaka sebuah kompeni peribit enggau sebuah parti laban dalam polisi konsituensyen bisi bida antara ROS enggau ROC, ku iya nambah.
“Sebuah kompeni enggau parti bebida, pia mega nyadi siku Presiden laban tetiap pemutus bepelasarka peneka enggau juluk pemansang ti deka dibai kaban dalam parti, Presiden ukai siku bos baka dalam sebuah kompeni ti diempu iya kediri.
“Snowdan patut nemu penuduk iya nyadi ADUN mega bepalasarka undi rayat di nengeri tu. Tang pengawa milih iya dichalunka baru bepelasarka pemutus presiden ti udah disetuju Kaunsil Tertinggi, ke alai pemutus ke penudi endar agi bepanggai ba jari Kepala Menteri.
“Maya PRU-14 tu, PRS bediri ari baruh payung Barisan Nasional (BN) taja pia Presiden BN ukai James Masing tang Menteri Besai Malaysia, pia mega baka PBB, PDP dan SUPP. Tang PBDS Baru, Presiden kami Cobbold John tau enchalunka kami bediri minta pilih ba pengawa bepilih kunsil nengeri tauka besai nitihka peneka iya.
“Pekara ti ngasuh geli ati pasal Masing iya nya laban iya suah madah ba media rama, ‘Anang Ngelaban Taukey’, tang iya empu udah ngaga ulah baka nya,” ku Rapelson kemari.