Jamit udah ngesah penusah angus di Rumah Lorie
KAPIT: Pengudah nerima berita penusah angus rumah panjai di Rumah Lorie @ Gembak Lebak di Nanga Ibau kena lemai Hari Enam tu tadi, Kaban Kunsil Nengeri (ADUN) Bukit Goram Jamit Unyat, lemai Hari Minggu, berumban mulaika diri ari Kuching, ngesah ngagai penusah nyadi, ngabas sida ti tasah angus.
Lebuhka datai di Rumah Lorie, penatai iya disambut Tuai Rumah Lorie enggau bala Komiti Pemansang enggau Pengelikun Genturung Pendiau (JKKK), bala ketuai opis sereta bala ketuai Gerempung Ukai Dikuasa Perintah (NGO), ti nganjung bantu ngenyit baka barang dikena besehari sehari enggau barang pemakai.
“Malam dulu, bisi orang mantaika gambar dalam Facebook. Aku telefon ngagai Kapit lalu ngenukuka pengamat penusah ke nyadi. Aku berumban kitu laban ibuhka pengelantang semua kita.
“Aku mega bekunsika penyinu sereta pengirau ati enggau kita lebuh penusah tu nyadi. Aku minta semua kita liat ati sereta seruran beserakup enggau tuai rumah sereta bala kaban JKKK, napi jam dituntung penusah,” ku Jamit.
“Ungkup bantu ngenyit, aku ngemai lebih RM8,000 mata duit. Pia mega ari Sapit Menteri Pemansang Menua Pesisir enggau Kandang Menua Datuk Alexander NantaLinggi RM 19,500 tauka RM 500 sepintu.
“Aku berasai siru mega pemanah ati mayuh bengkah gerempung, SUPP Kapit, raban ari Malaysian Red Crescent (MRC), Komiti Beratka Pengelantang Rama Methodist Pelilih Kapit, Kelab Lion Kapit, Balai Dagang China, Che Quan Khor Moral uplifting Society, Serakup Ketuai Raban Bansa China Kapit, Serakup Indu China Kapit, Marian Guild Mary Immanculate Conception Church, enggau ke bukai ti sikar nyediaka bantu diguna ninting hari.
“Bala sida datai ngemai pua, gari, kereban berapi, berau, pemakai dalam tin, gula, minyak makai enggau ke bukai. Pemanah ulah tu ditunda laban kitai endang amat ngemeranka Konsep Siti Komuniti,” ku Jamit muji.
“Aku temegah ati meda ejensi perintah bekaul diketuaika Komiti Pemutar Penusah Ngenyit Pelilih Kapit sikar ngatur pengawa. Opis Pelilih Kapit, Opis Pengintu Pengelantang (JKM), Polis, Opis Pengerejista Bansa (JPN) Kaunsil Sungai-Sungai Sarawak, Raban Nyaga Pengelikun Mensia Mayuh Malaysia (APM) Pelilih Kapit sereta ke bukai.
“Bala kita udah bejalaika pengawa chukup manah ba renggat baruh mantu sida lebuh begunaka bantu. Aku chukup ngenang pemanah pengawa semua kita,” ku Jamit nambah.
Seraya Tuai Rumah Lorie meri terima kasih ngagai Jamit enggau chalun BN P 215 Kapit Datuk Alexander Nanta Linggi, raban ejensi perintah, NGO, enggau raban ngatika diri ti bisi mantu sida. Ku iya, bala nembiak redak iya patut seruran ngenang pemanah sida nya.
Bisi nyempulang Jamit rambau pejalai nya Pemesai Ngatur Pengawa Opis Pelilih Kapit, Robert Anyaw enggau Wan Mohd Shukri, ASP Chua Su Hua, bala staf JPN, bala pemesai BOMBA, Penghulu Sia Shui Poh, Penghulu Pasang Tubak, chairman SUPP Kapit Ling Thian Ing, chairman MRC Kpait DrSiaTih Kong, presiden Kelab Lion Kapit Ting Bee Eng, chairman Komiti Beratka Pengelantang Rama Methodist Pelilih Kapit Ting King Yiing, sereta bala bukai.
Naka berita tu dikarang, pun penusah nyadi bedau ditemu. Dipelaba bepun ari sut sambung tali karan.
Kesemua 39 pintu Rumah Lorie @ Gembak Lebuk di Nanga Ibau Tengah angus lengis kena lemai Hari Enam ngujungka 236 iku peranak nadai rumah endur diau, tang nasit nadai sebarang penusah bebadi nyawa enggau bakar nyadi, semina sida lenyau reta enggau keresa diri aja.
Peranak 39 pintu Rumah Lorrie datai ari 108 iku lelaki seraya 128 iku indu.
Opis Bomba enggau Penyah Penusah Kapit nerima kangau ngenyit urung pukul 7.52 malam lalu seraban ari opis nya digerah ngesah endur penusah nyadi urung pukul 7.53 malam sereta mulaika diri urung dini hari, pukul 2.15 pagi Hari Minggu.
Rumah panjai tu ba tanah seberai Kapit lalu semina ulih dilawa ngena bot.