Anda di sini

BN S’wak keran deka menang ba sitak parlimen ke dikelai kelabu

Advertisement
 Zahid nyuaka chek ngagai pengari SJK Chung Hua Bt7 Matang di Kuching.
KE GUNA PELAJAR: Zahid nyuaka chek ngagai pengari SJK Chung Hua Bt7 Matang di Kuching.

KUCHING: Sapit Chairman Barisan Nasional (BN) Menua Datuk Seri Dr. Ahmad Zahid Hamidi netapka BN nadai napi penanggul menang di sitak parlimen Batang Sadong.

Ba aum pengarang berita di Palan Penerbai Bilun Kuching (KIA) ditu kemari, iya madahka BN Sarawak deka bebendar bekimpin ba sitak parlimen ke dikelai kelabu enggau chelum.

Dulu agi ari nya, Zahid ngulu program ketuai begulai enggau rayat di Simunjan.

“Enda semua sitak parlimen dikelai putih. Tang ba kandang endur ke ‘kelabu’ kitai deka bebendar agi ngereja pengawa ngambi ulih menang.

“Kitai meseti ngubah gaya politik ngambika rayat pulai nyukung BN,”ku iya ke mega Sapit Menteri Besai.

Sitak parlimen Batang Sadong dikuasa Datuk Seri Nancy Shukery (penyandang) ke mega Menteri ba Opis Menteri Besai.

Netapka tagit BN Sarawak menang ba 29 penuduk parlimen, Zahid madahka semua meseti bisi runding positif sentang pekara nya.

Diatu ku iya, BN keran deka mutarka sekeda isu ke bisi ditapi sekeda parti dalam gempung BN.

“Tu pekara ke suah nyadi ke alai sekeda parti deka napi pemar maya pengawa bepilih bisi diadu,”ku iya.

Sebedau aum pengarang berita nya, Zahid bisi nyuaka chek sepenyampau RM1 juta ngagai empat sekula Chung Hua.

SJK Chung Hua Bt 7 Matang nerima RM250,000, SJK Chung Hua Bt 11 Matang (RM200,000), SJK Chung Hua Bt 35 Serian (RM250,000) enggau SJK Chung Hua Syn San Too nerima RM300,000.

Advertisement