KUCHING: Kepala Menteri Datuk Patinggi Abang Johari Tun Openg pagi tu mantaika rintai nama chalun Barisan Nasional (BN) Nengeri dikena Napi Pengawa Bepilih Besai Ke-14 (PRU14).
Ari semua 31 sitak parlimen, Abang Johari ke mega Chairman BN Nengeri netapka 15 iku chalun baru lalu 16 iku penyandang.
"Ari PBB bisi enam iku chalun baru, SUPP mega enam, PRS dua chalun baru enggau SPDP seiku,"ku iya di Indu Opis PBB Jalai Bako ditu.
Munyika suah dipadah presiden Parti Rakyat Sarawak (PRS) Tan Sri James Masing, parti nyabung dua iku chalun baru iya nya Robert Pasang Alam di Lubok Antu enggau Rita Insol di Selangau.
Parti ngenanka Datuk Masir Kujat di Sri Aman, Datuk Wilson Ugak (Hulu Rajang), Datuk Joseph Salang (Julau) enggau Datuk Aaron Ago Dagang di Kanowit.
Ba kaul ke sama, Parti Progresif Demokratik (PDP) nyabung chalun baru di Saratok iya nya Subeng Mula ke alai presiden parti Datuk Seri Thiong King Sing deka ngenanka Bintulu, Datuk Anthony Nogeh di Mas Gading lalu Anyie Ngau di Baram.
Enam chalun baru ngarika Parti Pesaka Bumiputera Bersatu (PBB) iya nya Genot Sinel di Puncak Borneo, Robert Lawson Chuat (Betong), Yusuf Abdul Wahab (Tanjung Manis), Ahmad Jonie Zawawi (Igan), Dato Hanifah Hajar Taib (Mukah) enggau Lukanisman Awang Sani di Sibuti.
Chalun bukai PBB ke mega penyandang Dato Sri Fadillah Yusuf di Petra Jaya, Datuk Seri Rohani Karim (Batang Lupar), Datuk Seri Nancy Shukri (Batang Sadong), Rubiah Wang (Kota Samarahan), Dato Henry Sum Agong (Lawas).
Datuk Alexander Nanta Linggi (Kapit), Hasbi Habibolah (Limbang) enggau Dato Sri Wan Junaidi Tuanku Jaafar di Santubong.
Enam chalun baru SUPP iya nya presiden parti Datuk Dr. Sim Kui Huan di Stampin, Sebastian Ting (Miri), Andrew Wong (Sibu), Kelvin Kong(Lanang), Huang Tiong Sii (Sarikei), Kho Teck Wan (Bandar Kuching).
Seiku penyandang ngenanka penuduk parlimen ngarika SUPP iya nya Dato Sri Richard Riot di Serian.