PAKAN: Raban politik bansa Dayak enda tau ngemba bala tuai rumah deka muai tauka ngetuka servis megai pengawa nyadi tuai rumah ketegal ti enda sama penemu ba politik.
Ex-Sapit Kepala Menteri Tan Sri Alfred Jabu madah, jaku emba tu lebih agi enda engkeman diberi ngagai bala tuai rumah iya ke enda sepenemu enggau sida ba pekara politik.
“Anang beguai meri jaku emba baka nya semina ketegal sida enda nerima penemu kita anang agi enti sida tu endang orang ke kuat nyukung Barisan Nasional (BN),” pia ku iya madah.
Iya mantaika jaku lalau tu maya program betemu enggau rayat ba Rumah Segan Jubin di Engkamop ditu, ensana.
Jabu ti mega Penyanding Penemu Sains Perintah Nengeri madah, ulah baka tu tau bendar nejuka bala tuai rumah enggai agi meri sukung maya sukung sida dikena baka ba pengawa bepilih besai ti deka datai.
“Pekara tu tau ngasuh kita alah taja kita ngarika parti perintah.
“Kitai kala meda ulah ngemba baka tu nyadi lalu bala raban politik Dayak meseti beambi chunto,” ku iya madah baru.
Berindik ari nya, Jabu minta rayat di pelilih Julau enggau Pakan ngambika semina ngundi chalun BN aja.
“Menua Julau enggau Pakan udah disengkaum dalam projek Agropolitan Bukit Sadok.
“Anang ngayahka awak tu laban projek tu deka mai penguntung ke besai ngagai kita ba menua tu,” pia ku iya madah.
Iya madah, nyema penyakal menang ba PRU tu projek nya ila tau tejanggal.
Kebuah pia ku iya laban penyakal nadai pengari ba projek lalu projek nya deka puntan.
“Projek tu besai reti ngagai pengeransing perintah ti bebendar deka ngangkatka pengidup rayat,” ku iya madah.
Bela datai maya tu iya nya penyandang Kaban Parlimen Julau Datuk Joseph Salang Gandum enggau Ketuai Raban Nembiak Parti Pesaka Bumiputera Bersatu (PBB) Gerald Rentap Jabu.