Anda di sini

PBDS semina bediri minta pilih ba sitak majoriti Dayak

Advertisement

KUCHING: Parti Bansa Dayak Sarawak Baru (PBDS Baru) ngaga pemutus nadai netapka sesesapa bagi chalun ba sitak ukai majoriti Dayak, ba Pengawa Bepilih Besai Ke-14 (PRU14).

Bepelasarka penerang berita ti dikeluarka Direktor Pengawa Bepilih parti nya, Rapelson Richard Hamit madahka laban PBDS Baru nya parti penyakal nengeri tu ti bepelasarka bansa Dayak.

Nengah penerang nya PBDS Baru nudukka chalun ba enda lebih ari lima sitak, lalu apin lama parti nya madahka diri deka minta pilih ba Parlimen Mas Gading (Sapit Presiden, Patrick Anek);  Puncak Borneo, Sri Aman (Presiden, Cobbold John), Lubok Antu (Kaban Kunsil Tetinggi Parti, Johnny Chuat) enggau Selangau (Ketuai Raban Indu, Sylvia John).

“PBDS Baru enda bediri minta pilih ba sitak ti tebal ukai bansa Dayak ba PRU14.

“Lalu ngagai siti sitak Puncak Borneo, nama chalun deka dipadahka maya hari ngantung nama.

“Kami andalka STAR (Parti Reformasi Negeri Sarawak) ngambika bediri minta pilih ba sitak bukai ti ukai majoriti bansa Dayak, lalu patut ngawakka PBDS Baru bediri ba lima sitak tu,” ku Rapelson.

Kelimpah ari nya PBDB Baru mega nyangkal dawa ti madahka bisi bansa ukai Dayak deka ngena logo PBDS Baru maya PRU14.

Cobbold madah, taja pan bisi peminta ari sekeda orang tang parti keras enda setuju, tang ke patut tau nguji ngagai parti penyakal bukai ti enda ngira pupu bansa baka STAR.

“PBDS semina ungkup bansa Dayak aja. Kami enda ngemendarka bansa bukai ngena logoi kami maya bepilih tu.

“Parti tu ukai diempu siku aja tang diempu semua raban bansa Dayak. Kitai patut belajar ari pekara ti kala nyadi sebedau tu,” ku Cobbold.

Advertisement