KUCHING: Parti Tindakan Demokratik(DAP) Sarawak enda lantang enggau atur Opis Kunsil Kandang Padawan (MPP) ti ngasuh parti nya ngererak kanopi nyengkaum ningkilka poster ke dipasang di Opis DAP pampang Batu Kawa.
Chairman DAP Sarawak Chong Chieng Jen madah, surat ari Sekretari MPP diterima kena 20 April tu tadi ke alai parti dipinta ningkilka semua nya enggau naka pengelengkas.
Ke ngasuh kitai alit ati ditu ku Chong ke mega Chairman Pakatan Harapan (PH)Sarawak, surat ari MPP diterima tengahari 20 April lalu ba maya nya mega Parti Sa’Ati Rakyat Sarawak(SUPP) benung masang 2 kanopi sereta ngantung poster enggi sida.
“Tengahari kemari SUPP masang 2 kanopi enggau ngantung poster ba sepiak kami ditu ke alai enggi kami diasuh MPP tingkilka.
“Kami nanya opis kunsil ke alai saut ari sida madahka SUPP bisi ngatur pengawa lalu pagi tadi( kemari) udah ditingkilka sida,”ku Chong ba aum pengarang berita kemari.
Chong nambah enggi sida dipasang ngambi ngemudah mensia mayuh meresa status ngundi enggau aktiviti DAP.
Kelimpah ari nya ku iya, kitai mega bisi ngatur pengawa ditu ila (sehari tu) enggau Hari Satu.
“Ketegal nya raban penerit adat ari MPP majak ngachau kami ditu. Sida ngetu ngachau kami pengudah meda SUPP masang kanopi enggau poster besemak ditu,”ku iya.
Berindik enggau nya, Chong ke mega penyandang sitak parlimen Bandar Kuching enggau ADUN Kota Sentosa minta MPP anang bechiping bejalaika tanggungpengawa enggau.
Ku iya, opis kunsil patut nyendiaka servis ngagai rayat lalu ukai ngintu penguntung parti politik baka SUPP.
Kededua MPP enggau Majlis Bandaraya Kuching Selatan ku Chong dikuasa ADUN Batu Kitang SUPP Lo Khere Chiang ke nyadi Chairman enggau ADUN Batu Kawa SUPP Menteri Opis Kunsil enggau Pengawa Berumah Datuk Dr. Sim Kui Huan.