KUCHING: Barisan Nasional (BN) dipelaba ulih sereta nadai tentu penanggul ngetanka sitak Parlimen Sri Aman ti diarika pengari ari Parti Rakyat Sarawak (PRS), maya Pengawa Bepilih Besai Ke-14 (PRU14).
Penyandang parlimen nya Datuk Masir Kujat (PRS) dipelabaka ulih ngetanka baru sitak nya ti mungkur tiga Kunsil Nengeri (DUN) iya nya DUN Balai Ringin, Bukit Begunan enggau Simanggang.
Naka ke diatu, Parlimen Sri Aman deka ngayanka tiga penyuru iya nya entara BN, Pakatan Harapan enggau Parti Bansa Dayak Sarawak Baru (PBDS)
Pakatan Harapan (PH) ba aum pengarang berita ba palan operasyen DAP Batu Kawah apin lama, ngenukuka Norina Umoi Utot ari Parti keadilan Rakyat (PKR) deka nyadi chalun Pakatan Harapan (PH) enggau berebutka sitak Parlimen Sri Aman ba PRU14. PKR ti ngarika PH nerima sukung ari Parti Tindakan Demokratik (DAP).
PBDSB nengah penerang berita ensanus madahka parti nya dipelabaka presiden parti nya Cobbold John Lusoi dichalunka parti nya maya PRU14 sama enggau berebutka parlimen nya.
Bepelasarka penerang ari renggat baruh, BN ba parlimen nya agi ulih ngetanka sitak nya sereta enda meri peluang ngagai penyakal.
Tuai Rumah (TR) Genturung Pendiau Liu C, TR Denis Thomas madahka BN nadai penanggul ngetanka sitak nya beduduk pengari tauka penyandang parlimen nya beratka rayat sereta mai pemansang.
Iya bepenemu, raban penyakal ti semina ngayanka mua diri maya pengawa bepilih nadai ulih meri penguntung ngagai sitak sereta rayat.
“BN agi ulih 100 peratus ngetanka Parlimen Sri Aman. Tambah mega manifesto ke dibai chukup manah ti meri penguntung ngagai mengeri kelebih agi menua pesisir. Kitai arapka manifesto nya amat dipejalaika ila,” ku iya lebuh ditelefon Utusan Borneo.
Nambahka nya TR Genturung Pendiau Bayor, Tr Achu Saria mega sepenemu madahka BN agi ulih ngetanka sitak parlimen nya tang ari segi penambah enggau pengurang sukung engka bisi berubah.
Bepelasarka cherita kedai kopi ke bisi ngerimbas pendiang ku iya lebuh ditelefon, sekeda enda tentu lantang laban ti ngenang pemar diri.
“BN ulih menang tang kitai pedis deka nemu sekalika undi deka kusut tauka nambah. Diatu mensia udah landik amat bepikir,” ku iya.
Sapit Menteri Besai Datuk ti mega Sapit Chairman BN Datuk Seri Ahmad Zahid Hamidi ba sebengkah pengerami ba Sri Aman dalam bulan Julai taun nyin kemari, dekaka Datuk Masir Kujat agi dichalun ngetanka sitak nya, berindik ari ti puas ati ngagai chara iya (Masir) gawa.
Apin lama, Presiden PRS Tan Sri Datuk Amar James Jemut Masing udah madahka Masir ke nyadi penyandang Parlimen Sri Aman, dichalunka baru ngetanka sitak nya.
Ba pengerami tuai begulai enggau rayat ba Balai Raya Genturung Pendiau Sepan, Rh Lama Bungkol ti diatur bulan Februari tu tadi, Masir madahka sekalika diberi awak ngetanka sitak nya tauka enda, bepanggai ba pemutus Chairman BN menua Datuk Seri Najib Tun Razak.
Masir ti menang ba PRU 2008 enggau 2013, ba pengerami nya madahka diri enda irau tauka enda takut betapi enggau sebarang pengari penyakal ti bediri minta pilih ba parlimen nya, kena 9 Mei tu ila.
PRU 2008, Masir bediri minta pilih ngena tiket BN, ba sitak Parlimen Sri Aman. Maya tu, iya menang enggau teulihka undi sepenyampau 9,700 sereta teulihka majoriti 4,252 undi.
Chalun ngelaban iya ba PRU 2008, Cobbold John Lusoi (Ngatika Diri), teulihka 5,448 undi.
Ba PRU 2013, Masir teulihka 12,168 undi ngalahka Nicholas Mujah Ason (PKR) 5,618 undi ; Wilfred Stephen (SWP) 476 undi; Donald Lawan (Bebas) 3,867 undi. BN menang majoriti 6,550 undi , 75.20 peratus nurun ngundi.
Udah disahka ba aum pengarang berita ba palan operasyen DAP Batu Kawa apin lama, Norina Umoi Utot ari Parti keadilan Rakyat (PKR) deka nyadi chalun Pakatan Harapan (PH) enggau ngebut sitak Parlimen Sri Aman ba PRU14. PKR ti ngarika PH nerima sukung ari Parti Tindakan Demokratik (DAP).
Norina chalun ti meri peluang ngagai PH arap bendar ulih ngerebut sitak nya ari BN ti diarika PRS ke betapi enggau penanggul dalam parti, kelimpah ari ti nerima sukung ari DAP.
Dikena ngenegapka agi PH di Sri Aman, siti komiti ti dipasuk PKR enggau DAP udah ditumbuh dikena merambu strategi ngerampas sitak nya ari BN.
Ke pemujur PH ngambika ulih menang ba Sri Aman, Norina ngarapka Parti Bansa Dayak Sarawak Baru (PBDSB) nyurut diri ari minta pilih ba sitak nya, ngambika ulih betengali alan.
Taja pia, PBDSB deka bediri minta pilih ba parlimen Sri Aman nengah presiden parti nya, Cobbold John Lusoi.
PBDSB udah mantaika manifesto ke alai deka beratka 44 pekara sereta lebih beratka hak enggau pengelantang rayat nengeri tu. Tuju manifesto nya dikena nentuka tusun pengaw perintah pengudah tu nadai bechiping sereta beresi.
Bepelasarka statistik Komiti Pengawa Bepilih, penyampau pemilih ke berejista ba PRU14 ti digazet kena 10 April 2018, ungkup sitak Parlimen Sri Aman bisi 33,016 iku ari semua penyampau pemilih di serata Sarawak bisi 1,220,960 iku.