JULAU: Penyandang penuduk Parlimen Julau Datuk Joseph Salang Gandum ngelalau bala ketuai raban bansa ti diemba deka diketu ari pangku pengawa enti sema sida nyukung Barisan Nasional (BN) enda ibuh berasai takut.
Ku iya, bisi sekeda bala ketuai raban bansa mega diemba enda diberi belanja pemansang menua pesisir.
“Lalau aku ngagai sida (bala ketuai raban bansa) ngambika anang takut dibuai gawa maya milih diri nyukung BN,” ku iya.
Iya mansutka jaku nya lebuh bejaku rambau program begulai enggau rayat di Rh. Meru Sagong, Sungai Engkabang, Ulu Entaih ditu sebedau ngulu program ke sama di Rh. Senabong Mata di Nanga Latoh semak ditu, lemai kemari.
Nitih ku Salang, iya berasai asa amat lebuh bisi sekeda raban sanggup ngereja ulah ke bansa nya.
Ku iya, mayuh agi ari elawin ti diterima ketuai raban bansa dibayar perintah besai lalu semina mimit aja dibayar perintah nengeri,” ku iya.
Pengundi di sitak ku iya datai ari raban ngembuan pelajar lalu ulih nyerenih ketuai ti seruran begulai enggau rayat.
Ngelansa pasal berita ex-chalun Parti Keadilan Rakyat (PKR) Andy Wong ti bisi ati bediri minta pilih baru pengudah ngelaban iya maya pengawa bepilih besai suba, Salang semina nimbal enggau tanya, dini pendiau iya kandang empat taun ke udah.
“Sekalika iya bisi diau ditu gawaka rayat tauka mutarka penanggul sida,” ku iya nanya.
Nya alai Salang ngelalau rayat di sitak nya bejejaga enggau kaban politik nitihka musim sereta ulih gawa tang datai semina deka nginti undi aja.
Ku iya, sida tu (kaban politik BN) mega nadai belanja pemansang perintah besai sepenyampau RM7 juta baka ti diagih ngagai pengari rayat BN ninting taun ungkup timpuh lima taun ti deka datai.