KUCHING: Tanggungpengawa Communitty Emergency Response Team (CERT) patut dikerembaika awakka ulih mantu ngereara api sereta nyaup mutarka penusah angus di nengeri tu.
Sapit Kepala Menteri ti mega Chairman Komiti Mutarka Penusah Ngenyit Sarawak, Datuk Amar Douglas Uggah Embas madah, kebuah pia laban Sarawak nanggung pengerugi nyauka manggai RM100 juta ketegal penusah angus ba taun 2016 engga
u 2017.
Lalu sebengkah ari inisiatif ke dipejalaika dikena ngenukuka pengasi tanggungpengawa CERT iya nya, bisi 15 unit ‘portable fire pump’ diberi ngagai 15 tim CERT.
Entara 15 CERT ke nerima pam iya nya ari Batu Kawa, Simpok, Senah Rayang, Bunan Gega, Buntal, Sebuyau, Tanjung Engkabang, Engkilili, Debak, Sungai Jih, Kemunting, Jepak, Belaga, Nanga Medamit enggau Long Sukang.
“Nitihka ripot, Sarawak nanggung pengerugi nyauka manggai RM100 juta ketegal penusah angus ba taun 2016 enggau 2017, tang dalam timpuh ke sama enggau penyikar raban bomba sereta bomba volenteer udah nyelamatka reta tengkira berega nyau deka manggai RM190 juta ba taun 2016 enggau RM357 juta ba taun 2017.
“Nya alai amat beguna perintah ngerembaika CERT ba pengawa mantu ngerara api nyema bisi penusah angus. Lalu kitai mega nyukung penuh pengeran deka numbuhka CERT tu ba semua 82 Kunsil Nengeri (DUN) di Sarawak.
“Ngambika tim CERT tu ulih mantu enggau sikar, nya alai sida diberi injin pam tu. Kitai merambu deka nambahka beberapa agi unit pam tu ngambika pengering CERT ulih ditegapka maya mantu ngerara api sereta ngurangka penusah angus,” ku iya.
Uggah mansutka pekara nya lebuh dikerandau raban pengarang berita pengudah tembu pengerami nyuaka ‘portable fire pump’ CERT ti diatur ba Indu Opis, Opis Pengerara Api enggau Penyah Penusah Nengeri (JBPN) Sarawak ditu, kemari.
Pengawa nyendiaka pam nya asil kerejasama entara perintah nengeri nengah Unit Keselamatan dan Penguatkuasaan Negeri (UKPN) enggau JBPN Sarawak sereta PETRONAS.
Ngenang penumbuh CERT maya bejaku ba pengerami nya, ku iya, endang meri penguntung sereta pemanah ngagai genturung pendiau kelebih agi ti jauh ari ejensi baka Bomba, kelimpah ari program CERT dikena ngempitka takah entara pemesai, rayat enggau perintah.
“Tim CERT tu deka diberi latih sentang semua penemu bekaul enggau penusah ngenyit. Latih ti baka nya deka meri inisiatif ngagai sida mantu tumu ba endur penusah nyadi sementara nganti raban penyelamat enggau bantu ari ejensi ti bekaul,” ku iya.
Berebak enggau tu Uggah beterima kasih ngagai PETRONAS ti meli pam nya nengah program tanggungpengawa rama korporat (CSR), ti beungkus RM30,000 seunit.
Sama bisi datai, Menteri Kaunsil Kandang Menua enggau Pengawa Berumah, Datuk Dr. Sim Kui Hian, Direktor UKPN, Dato Dr Chai Khin Chung, Direktor JBPN Sarawak Nor Hisham Mohammad enggau Ketuai Pemesai Eksekutif Malaysia LNG Sdn Bhd, Pau Kiew Huai.