Anda di sini

Rayat Sarawak ngarap TV OKEY pelasar endur bulih penerang ke betul

Advertisement

SIBU: Rayat sitak tengah Sarawak ngarapka channel baru RTM, TV OKEY, ulih nyadi pelasar dikena ngulihka penerang ke betul sereta pemadu baru ba dalam enggau di menua luar.

Sekretari Politik Kepala Menteri, Teng Ung Woo madah, atur perintah numbuhka channel baru endang dikelalu laban nya tau meri pemaik ngagai rayat pupu bansa di Sabah enggau Sarawak.

“Tu mega dikena ngamatka peminta ti mayuh ari rayat pupu bansa lebih agi bekaul enggau berita tauka penerang ke diguna diri empu ngambi muntang dipereti,” ku iya madah ngagai Bernama, ensana.

Menteri Besai, Datuk Seri Najib Tun Razak bejadika TV OKEY malam kilah ensana ngasaika nya ulih nambahka pemanah kaul entara perintah enggau rayat sereta nyungkak industri kreatif ba kededua nengeri tu.

Kelimpah penerang bekaul enggau program pemansang, Teng, madah polisi-polisi perintah ulih dikenataika ngagai rayat nengah pengawa ngena jaku asal suku bansa ba kededua nengeri tu.

Ba siku orang dagang di Sarikei, Poi Chee Teck, atur perintah nengah RTM tu chukup engkeman laban rayat ba menua pesisir begunaka penerang rasmi ke amat sereta pemadu baru bekaul isu ke nyadi kemaya hari.

Kenu ku iya, pangka teknologi digital jam ke diatu ngujungka kelalu mayuh penerang ayan ba media rama nyengkaum ke bula sereta ngasuh rayat saru.

“Tu chukup manah laban iya deka ngayanka program-program khas nyengkaum berita baru ungkup Sarawak enggau Sabah bekaul enggau politik, ekonomi, pemansang infrastruktur enggau rama.

“Iya mega ulih mantu ngelakuka Sarawak enggau Sabah sekalika ba dalam enggau menua luar lebih agi ba sukut penyerakup enggau pengelantang rayat pupu bansa ke mayuh adat enggau main asal ke patut dijaga,” ku iya.

Berebak enggau nya, siku agi kaban Opis Kaunsil Pelilih Menua Pesisir Sibu (MDLBS), Tang Tung Kwang, mega ngasaika atur perintah nya chukup manah lalu ngarap rayat ari kededua nengeri ulih diberi awak bejalaika channel televisyen ke baru nya.

Ahmad Talha @ Ahmad Ali Telaha, siku kaban Kaunsil Pelilih Sarikei (MDS), madah inisiatif perintah baka nya ulih ngedut ngupitka kaul entara rayat ari kededua nengeri enggau perintah nengeri sereta perintah besai.

Channel TV OKEY ulih dipeda ba MyTV 110 enggau Astro 109. — Bernama

Advertisement