KUCHING: Sarawak begunaka pakar tauka orang ti pandai sereta bepengelandik lebih agi dalam teknologi dikena nyapai juluk nengeri nuju ekonomi digital.
Berindik ari pekara nya Menteri Pelajar, Sains enggau Pemansik Teknologi Dato Sri Michael Manyin Jawong ngarapka pakar serata dunya ulih bekunsi penemu enggau peneleba dalam teknologi dikena mantu ngamatka juluk Kepala Menteri dalam ekonomi digital.
"Kitai ngelaluka lebih agi pakar dalam bidang digital mantu kitai mutarka pemar ke ditapi nengeri.
"Kepala Menteri kitai udah madah kitai nadai pilih bukai kelimpah ari nuju sereta ngemeratka digital enti deka ngemansangka Sarawak 2030.
"Nya alai, kitai amat begunaka pakar. Kebuah iya laban kitai semina deka ngemansangka modal mensia, kitai bisi pengeraja asal tang kitai nadai modal mensia.
Manyin mansutka pekara nya lebuh bejaku seraya bejadika pengawa nutup IBM CSC Malaysia 10: Kuching, Sarawak ti diatur ba Menara Pelita, the Isthmus ditu, seharitu.
Ambika banding menua maju baka Singapura enggau ke bukai ti kurang pengeraja asal tang ulih maju laban ti mayuh modal mensia.
"Enti kitai bisi pemansang modal mensia kitai ulih enggau lengkas (nyapai ekonomi digital)," ku iya.