Anda di sini

Pelajar ke menyana nyadi kunchi nuju pengidup meruan

Advertisement
 Nyalau (empat kiba) begambar kenang enggau Boo (empat kanan), Zaini (tiga kiba) sereta bala bukai nyengkaum nembiak ka nyulut bulih A ba peresa PT3 ba taun 2017 tu tadi.
TANDA KENANG: Nyalau (empat kiba) begambar kenang enggau Boo (empat kanan), Zaini (tiga kiba) sereta bala bukai nyengkaum nembiak ka nyulut bulih A ba peresa PT3 ba taun 2017 tu tadi.

LUBOK ANTU: Pelajar ke menyana nyadi kunchi nuju pengidup ke lebih meruan dikena ngubah rayat ari pekuh penyeranta.

Kaban Parlimen Lubok Antu Datuk William Nyalau Badak nyemetak madah enti nadai pelajar ke menyana enggau enda apus sekula deka ngujungka nembiak rebak baru tusah deka besemekih enggau bala bakih ti serambau lebuh agi dalam nyapai juluk ati.

Nya kebuah, aku suah ngelalau bala apai indai ngambi nyendia peluang pelajar ke menyana ngagai bala anak laban serak sida nya deka nentuka kuing tujum diri sebilik, nengeri sereta menua Malaysia jemah ila,” ku iya.

Tambah mega, aku enda leju mesan ngagai kita ke apai indai sereta pengibun ngambi enda betegalka penyeranta nyadi peneku dalam nyendia pelajar ke menyana nyentuk ngagai tikas universiti laban perintah ke diiring Barisan Nasional (BN) nyendiak mayuh perengka guna nyengkaum lon enggau skularship ngagai bala nembiak ke deka nampung pelajar diri,” ku iya.

Iya madah munyi nya rambau bejadika Aum Besai Gerempung Apai Indai enggau Pengajar (PIBG) Sekula Sekondari (SMK) Lubok Antu ditu kemari. Sama bisi datai Tuai Dipebasa (YDP) kaunselor Zainie Aji enggau Prinsipal Boo Mee Lian.

Tambah mega, endang udah nyadi misyen enggau visyen iya ke nyadi Kaban Parlimen Lubuk Antu deka meda genap pintu ruang bilik ngembuan abis nadai dua iku graduet lalu nya deka nangkup makit pengawa orang gawa landik enggau jelan pengelandik ba nengeri enggau menua tu jemah.

Diatu perintah nengeri nengah iring Datuk Amar Abang Johari Tun Abang Openg nyelinting rayat Sarawak ti kurang penatai pemisi iya nya pemadu mimit RM4,000 sebulan manggai taun 2020...nya utai dikearapka kitai lalu enggau misyen nya ulih dijapai jemah lalu bala nembiak rebak baru diatu patut disikap enggau penemu ke tinggi,” ku iya.

Berebak enggau nya, Nyalau minta apai indai enggau pengajar bela bekerejasama laban enti nadai sukung ari semua piak tauka PIBG tentu juluk perintah nya tusah dijapai.

Ku iya, prinsipal enggau pengajar nyengkaum apai indai nengah PIBG patut dalam siti tim anang ngaul politik dalam pekara pemansang pelajar laban nya enda manah ke pemujur akademik nembiak.

Nyangka ukai semua apai indai enggau pengajar ngembuan runding ke baka nya tang aku ngarap kita enda ngaul pekara politik enggau pekara pelajar anak lebih agi dalam pangku pengawa PIBG,” ku iya seraya madah nembiak ke ditempa sehari tu tau teulih pemujur sebaka enggau orang bukai.

Ba pengerami nya, Nyalau bisi ngungkupka insentif RM100 ngagai bala nembiak ke bisi bulih A dalam SPM genap mata pelajar. Udah nya, nembiak ke ngambi PT3 ke bulih 5A deka diberi insentif RM50 ungkup siti mata pelajar lalu penyampau agih belanja RM15,000.

Nyadi tambah, iya mega ngungkupka belanja RM150,000 dikena ngemanahka balai raya enggau jalai ba kandang sekula nya.

Pengerami nya bela digulu urung RM500 temuai nyengkaum Sapit YDP Jimbun Massa, penghulu, kaunselor, kapitan, tuai-tuai rumah, enggau apai indai nembiak.

Advertisement