Penumbuh palan tu udah nyadi nyata dikena ngerembaika agi pemansang Ulu Rajang di sitak menua Tengah Sarawak
KAPIT: Sapit Kepala Menteri Tan Sri Datuk Amar Dr. James Jemut Masing madahka peranak Kapit udah lama nganti penumbuh ejensi khas dikena ngerembaika pemansang Ulu Rajang di sitak menua Tengah.
Iya mansutka jaku tu lebuh bejadi muka Makmal Khas Ejensi Pemansang Ulu Rajang (URDA) 26 ngagai 28 Febuari 2018 di Palan Sivik Kapit kena pagi Hari Satu, ti udah digulu urung 300 iku pesereta.
Bala pesereta datai ari ejensi enggau opis perintah nengeri enggau perintah besai, raban politik enggau bala ketuai komuniti. Makmal Khas URDA ti diatur berengkah ari kemari nyentuk 28 Febuari tu.
Ku Masing nikalka kenang rambau Aum Kedua Kaban Kunsil URDA, diatur kena 7 November 2017, iya udah ngerah Datu Haji Ismawi, udah nya nyadi Sapit Sekretari Nengeri ngatur makmal khas ungkup URDA.
Iya meri terima kasih ngagai URDA enggau tim nya ti udah ulih ngatur bengkel pengelama tiga hari berunggu di Kapit.
“Peranak di Kapit seruran bisi pengingin ngembuan ejensi khas dikena ngerembaika pemansang. Mimpi tu nyadi nyata pengudah Kepala Menteri ngemendarka pengawa numbuhka URDA, di baruh perati RECODA, rambau penemuai iya ngagai Kapit, kena 25 April 2017.
“Ba pekara tu, aku deka meri terima kasih ngagai Kepala Menteri laban udah ngayanka pemereti ati iya ba peminta rayat ngemai mayuh agi pemansang ngagai Kapit lalu pengeran iya ngelengkaska pemansang di kandang menua pesisir,” ku Masing.
“Pekara dibantaika nya mega diterima manah bala ketuai komuniti di Kapit enggau semua sida nyamin diri deka meri sukung tegap ngagai perintah ba pengawa numbuhka URDA.
“Tu kelai singkang pengawa dikena nentuka Kapit enda tinggal di belakang dalam pemansang besai dibanding ngagai serata Sarawak,” ku Masing.
“Pengawa ngemansangka kandang menua ulu bedandang besai baka Ulu Rajang endang pemar besai ngagai nengeri tu.
Iya mungkur kandang menua 41,000 km persegi pemesai enggau penyampau tubuh peranak 175,000 (semina 6.5 peratus ari penyampau tubuh di Sarawak).
Kandang menua Ulu Rajang mungkur kesemua bagi menua Kapit, datai ari Pelilih Kapit, Bukit Mabong, Belaga, enggau Song, sebagi ari Bagi Menua Sibu iya nya Pelilih Kanowit, bisi tiga sitak Parlimen iya nya Hulu Rajang, Kapit enggau Kanowit, tujuh sitak bepilih kunsil nengeri (DUN) iya nya Machan, Ngemah, Katibas, Bukit Goram, Pelagus, Baleh, Belaga enggau Murum. Menua tu empu nunjukka kompleksiti iya,” ku iya.
Taja pia ku Masing, kandang menua tu diberekat enggau pemansut asal, baka kuasa hidro, kampung, dandang tanah, arang, sereta mega pengelain utai tumbuh enggau utai idup, nyengkaum ikan Empurau kitai ti tebilang enggau buah dabai, ti meransang pengerembai enggau pemansang ekonomi nengeri.
Ku iya, pekara tu mega beguna endar ngagai kitai ngerebut pengulih pemansang tu dalam sistematik enggau koordinat enggau meruan, nentuka kitai ngangkatka pemanah tikas pengidup rayat, nambahka penatai pemisi, nyediaka pengawa puang mayuh agi enggau awak dagang, ulih ngubah Ulu Rajang ngagai kandang menua ti besemangat di nengeri tu.
Ku Masing, makmal khas URDA endang patut ba maya iya, laban iya deka ngasuh bala pemegai saham, kelebih agi raban politik menua tu, bala ketuai komuniti enggau ketuai opis berandauka strategi enggau merambu pelin pemansang, program enggau projek pulaika pemaik rayat di nengeri.
Iya beratika makmal khas URDA tu diatur ngagai mayuh bengkah kandang menua mit ngambika berate pengulih enggau peminta lalu udah nya datai enggau pelin pemansang, program enggau projek ungkup mayuh bengkah bagi menua mit.
Bagi menua mitt u diketuaika Pemesai Pelilih sida empu, ti diberi pangku pengawa khas ngerembaika pemansang di pelilih menua sida.
“Makmal khas URDA tu mega kelai jematan besai dalam ngiga jalai nyingkang mansang ngagai chara pelin pemansang timpuh pandak, jelan iya pengelama enggau timpuh panjai di Ulu Rajang.
“Tu pengawa dikena nyediaka awak ngagai rayat di menua tu mantaika peminta sida ba pengidup dudi hari seriris enggau juluk Sarawak deka nyadi nengeri bepenatai tinggi datai ba taun 2030.
“Semua pesereta ti ngambi bagi dalam makmal khas URDA diansak beratika pekara tu enggay berat. Naka ulih kereja pengawa kitai memanah maya berandau nentuka ulih dikenatai memanah, asil positif enggau pemutus ti ulih ngenataika asil ari makmal tu.
“Nyadi chairman URDA, ngiga enggau pekara dikemendar ba makmal khas URDA tu endang beguna endar ngagai aku ngambi dibantai ngagai kaunsil RECODA nyadi sukung enggau belanja.
“Aku andal amat makmal tu deka beratika pemar, isu enggau penanggul ditapi di kandang menua tu, ba pekara fizikal enggau kaul digital, pekara perengka guna pemun enggau ekonomi rama, baka pelajar, pengerai, pengelikun enggau dagang,” ku Masing.
Ku iya nambah, Kapit pasar ti nyelai sereta manah dipeda, kaya enggau main asal, pesaka sereta ekonomi dagang temuai lalu aku ngarapka semua kita ulih nyadi raban ti ngelakuka menua Kapit nyadi palan ditapatka dagang temuai.
Antara bala bisi datai ngulu atur pengawa bengkel tu iya nya Kaban Parlimen (MP) Kapit Datuk Alexander Nanta Linggi, Menteri Muda Bekal Ai Datuk Liwan Lagang, MP Kanowit Datuk Aaron Dagang, MP Hulu Rajang Datuk Wilson Ugak Kumbong, Kaban Kunsil Nengeri (ADUN) Ngemah Alexander Vincent, ADUN Katibas Datuk Ambrose Blikau Enturan, ADUN Pelagus Wilson Nyabong Ijang, ADUN Bukit Goram Jefferson Jamit Unyat, enggau ADUN Murum Kennedy Chuipai Ugon sereta bala bukai.