Anda di sini

Mensia mayuh dilalau ngemeratka pengelikun di jalai alun

Advertisement

JKJR deka nyadi raban penerit adat ti nentuka pengelikun mensia mayuh ke betengahka projek PBH ti dipejalai diatu

 Dr. Jerip (dua kanan) nangkupka topi keledar ba siku penguna lebuh atur pengawa Kimpin Pengelikun Jalai Alun beserimbai enggau Taun Baru China renggat Nengeri Sarawak di Kuching Sentral ditu, kemari. Sama bisi dalam gambar, Davina (tiga kanan).
BEJIMAT: Dr. Jerip (dua kanan) nangkupka topi keledar ba siku penguna lebuh atur pengawa Kimpin Pengelikun Jalai Alun beserimbai enggau Taun Baru China renggat Nengeri Sarawak di Kuching Sentral ditu, kemari. Sama bisi dalam gambar, Davina (tiga kanan).

KUCHING: Mensia mayuh dilalau belubah sereta bejimat lebuh ti betengahka projek Jalai Besai Pan Borneo (PBH).

Menteri Muda Perengka Pengangkut Datuk Dr. Jerip Susil madahka diatu projek PBH benung digaga lalu sigi ditemu, mayuh endar penanggul ditapi ketegal jalai alun ke benung digaga, ari sukut pengelikun sereta penanggul bukai.

Opis Pengelikun Jalai Alun (JKJR) beratika pekara tu lalu sida mega nyadi sebagi ari penguasa trafik (traffic management) maya projek PBH ti benung dipejalai diatu.

Lalu baka nya mega enggau Konsultan Penguasa Trafik (TMC) patut ngaga siti chara bakani JKJR deka ngaga standard ke semua atur pengelikun. TMC deka meri bantu tauka meresa ari sukut infrastruktur ngagai semua kunteriktor ti ngaga PBH,” ku iya.

Dr. Jerip madah munyi nya lebuh ngelalau mensia mayuh ke pulai kemisi beserimbai enggau Taun Baru China (TBC), ba atur pengawa Kimpin Pengelikun Jalai Alun beserimbai enggau Taun baru Cina renggat Nengeri Sarawak 2018 di Kuching Sentral ditu, kemari.

Iya nandu baru madahka kimpin bansa tu ukai semina ke pengerami TBC aja, tang semua hari besai bukai baka Hari Raya, Gawai enggau Hari Krismas.

Maya tu, mayuh orang pulai ke menua sereta nengah jalai alun, nya alai, bejimat sereta jaga pengelikun kita maya hari besai tu” ku iya, lalu nandu baru madahka kimpin tu mega bekerejasama enggau ijinisi Puspakom, Opis Kereja (JKR), Opis Pengangkut (JPJ), swasta sereta mensia mayuh.

Ba lansa bukai, iya madah, statistik bebadi jalai alun ke serata menua Sarawak bisi udah kurang dalam taun 2017.

Sarawak ngerikod pengurang penyampau sida ke bebadi di jalai alun dalam kandang 7 peratus, iya nya 400 nyawa dibanding enggau 432 (2016).

Kitai ngarapka taun 2018 tu, ulih ngurangka penyampau tu, nengah chara intervensyen ari sekeda opis penguasa bukai ba program pengelikun jalai alun ke digaga sida,” ku iya.

Iya nandu baru madahka beserimbai enggau TBC tu mega, siti operasyen iya nya Ops Selamat berengkah digaga ari 9 nyentuk 23 Februari, lalu tu operasyen begempung ti digaga Polis Diraja Malaysia (PDRM) enggau Opis Perengka Pengangkut Darat (JPJ) ke bejalaika kuasa undang-undang jalai alun.

Ba pekara tu mega, Dr. Jerip nandu baru madahka sebagi ari program pengelikun jalai alun mega bisi ngaga program meresa pengelikun kerita (beserimbai enggau TBC tu) ba sebarang pampang Puspakom di nengeri tu, ke ulih digaga nadai bebayar entara 5 nyentukka 15 Februari.

Pemerat tuju Puspakom, ngambika meransang mensia mayuh meresa kerita sida enggau silik ari sukut pengelikun, sereta pekara bukai,” ku iya.

Kelimpah ari nya, iya madah ‘Community Road Safety Alert’ (CRSA) enggau Opis Kunsil Pengelikun Jalai Alun (JKJR), deka ngatur siti pengawa pengelikun jalai alun ungkup mensia mayuh ke nengah jalai alun ke seruran napi bebadi.

Di Sarawak, 17 buah sitak dikelala suah napi penanggul bebadi jalai alun, lalu sitak tu ke diperatika enggau silik,” ku iya.

Sama bisi enggau ngulu atur pengawa nya kemari, Direktor JKJR, Davina Enteli, Philip Ng ngarika Sekretari Mendam Opis Menteri Pemansang Infrastruktur enggau Pengangkut, Opis Tasat enggau Atur Kuasa Trafik IPK, ASP Franklin Andy anak Kemping enggau Sapit Direktor pampang Atur Kuasa JPJ, Albert Clement.

  • oleh
  • Advertisement