JULAU: Lebih 300 iku ketuai renggat baruh nyengkaum 120 iku tuai rumah, bala penghulu, kaunsilor sereta kaban Komiti Pemansang Enggau Pengelikun Genturung Pendiau (JKKK) begempuru di laman Balai Komuniti Julau kemari mantaika pengandal sida deka bisi peranak menua nya empu ti bepenau ngarika sida di parlimen.
Tu semina gempuru likun beserakup ti ngaul pengawa begambar bebala mayuh, pia ku Tuai Rumah Liban @ Emparak Gueng, ke nyadi pengari bejakuka sida.
Ku iya, gambar nya ngayanka pengandal sida ti minta diperundingka bala ketuai tetinggi Barisan Nasional (BN) ngambi milih chalun ulih menang ngetanka penuduk sitak parlimen Julai maya pengawa bepilih besai ti deka datai.
Genteran jaku nyata diayan ba atas kain rentang, pesan sida deka minta berekat ari bala ketuai tetinggi Bn ngambi nerima Nyempah Sabot nyadi chalun BN ngarika Parti Rakyat Sarawak (PRS) ngetanka penuduk Julau maya pengawa bepilih ti deka datai, tandu iya.
Peranak Julau dekaka peranak menua nya empu ngarika sida lalu sida ngasaika maya bepilih tu maya ti engkeman laban sida udah bisi chalun menua nya ti bisi penau.
Penghulu Undi Chuat ari Pakan madahka iya nyukung gempuru serakup laban iya bebasaka peminta majoriti peranak Julau, nambah, semua deka nentuka pemenang BN.
Bala sida pechaya Nyempah ulih menang ba penuduk nya ungkup BN laban iya udah nangkup kriteria ti ditetapka pengundi, ku iya nerang, seraya nambah, sida rindu agi milih peranak menua nya empu ti ulih bekerejasama enggau Kaban Kunsil Nengeri (ADUN) Pakan enggau Meluan sereta ejensi perintah ngambi ngintu pengelantang sida.
Ex-Kaunsilor Janin Unging ngasaika Nyempah nyadi chalun pemadu manah belalauka penegap sukung di renggat baruh ngambi bisi pengari peranak menua tu empu.
Janin ke mega mandal chairman PRS pampang Pakan ngasaika tu benung pemanah iya endur penyandang empat penggal, Datuk Joseph Salang nyerahka pangku pengawa ngagai Nyempah, ke nyadi Chairman PRS Meluan.
Ex-Penghulu Endawie Entingie madahka penatai mayuh bala ketuai ari renggat baruh ti datai ari bala penghulu, tuai rumah sereta bala kaban JKKK ngayanka peranak di Julau dekaka chalun baru enggau regas ngarika sida.
Iya ngarapka bala ketuai tetinggi BN deka mending sereta bebasaka peminta sida lalu berundingka sida nyadi penyukung BN ti taluk ngambi menang ba penuduk nya maya pengawa bepilih ila.
Penghulu Dandan Ujang, Penghulu Clement Nesau and Penghulu Ting Tiew Look mega bisi datai begempuru madahka sida endang nyukut Nyempah nyadi chalun BN laban iya dipilih majoriti peranak Julau.