MIRI: Raban pekebun sawit bansa asal Dayak di Sarawak ngelancharka kimpin baru dikena mantaika penerang ari piak sida bekaul enggau cherita sawit.
Kimpin ke digaga Serakup Penanam Sawit Dayak Sarawak (DOPPA) nya mantaika pekara bekaul minyak sawit ari sukut pekebun asal empu.
DOPPA iya nya siti entiti nyelai renggat dunya laban semina serakup nya aja raban ti ngarika peminta pekebun mit asal ba industri minyak sawit.
DOPPA ngarapka projek deka nerang ngagai semua, ke alai ukai semina sawit ngasuh rampa menua kamah sereta ngeruga hak mensia.
Bejaku ngelansa pinta ari 174 saintis ba pengawa ngena minyak sawit dalam biofuels, nitihka penemu sida minyak sawit deka mai pengerusak ngagai rampa sosio menua enggau nadai dikelaung, Mandal Presiden DOPPA Rita Insol madahka sida tu pekebun mit gawa ba atas tanah ke ditampung ari niang aki ini sida.
“Bisi sekeda kitai lenyau tanah laban dikena kitai besilih pengawa. Laban kitai tama abad ke-21, kitai nemu bisi pematut muka ladang ti tegap sereta meruan ke alai kitai ngarapka pengidup diri menyana agi seraya nyediaka pengidup dudi hari ngagai rebak dudi bansa asal di Sarawak.”
Penanggul baru ba minyak sawit enda lari ari perati DOPPA.
“Tu mih chara dikena beratika sida ti bepenau bejuraika pasal hak kitai ke nyadi bansa asal berindik ari kitai baka ti enda ulih bejaku ngarika diri empu. Tu siti pekara ke enda betul. Kitai, nyadi bansa asal Borneo udah lama negika hak diri.”
Ku Rita nambah, sida meri terima kasih ngagai raban NGO ti udah bejaku ngarika sida tang sida deka bejaku kediri empu sekali tu, kelebih agi enggau sekeda NGO ti ngeruga pengidup sida nengah pengawa ngachau sawit.
“Kitai endang bepanggai ba sawit nyadi utai tanam dijual nentuka kami ulih ngasaika standard pengidup ke sama enggau raban NGO tu. Apai indai kami negika pengawa begulai enggau soldadu Australia enggau British dikena ngetanka tanah kami. Kami meruan ngenang pemanah menua tu nyaup kami ngetanka tanah kami.
“Kami kelebih agi meri terima kasih ngagai United Kingdom ti udah ngiring kami ngemansangka Sarawak. Kayu sawit ti dibai ngagai Sarawak ari perintah British dalam taun 1960 nyadika jalai mansang ke rejeki udah nyata dipeda.
Ku Rita nambah, bansa asal Borneo enggau pekebun abad ke-21, sida diatu ulih ngetanka diri empu ba tanah ditampung ari apai indai diri, diintu begulai enggau soldadu Australia enggau British.
“Mayuh kitai bumai, bekebun buah enggau besayur ba tanah asal diri dikena beridup lalu bepanggai ba asil tanam ke dijual dikena bebelika utai tanam ke enda ulih dibeli kitai. Sawit meri kuasa pemisi ngagai kami ke nyadi bansa asal.”
DOPPA ngarapka jaku enggau kimpin nya bisi diterima sida ti mantah projek nanam sawit, mandangka sida tu mih alai bansa asal berasai nyima ari ulah diskriminasyen mantah sawit.