Anda di sini

Tiga sampel ketup ukui ditemu positif virus Rabies

KUCHING: Tiga chunto ketup ukui positif virus Rabies diterima kemari iya nya ari tiga palan ke udah digazet sakit rabies.

Nitihka penerang ari Sekretariat Komiti Mutar Penusah Negeri (Sakit Rabies), palan kes iya nya di No. 16, Taman Dirgahayu, Jalai Sim Kheng Hong Selatan Lurung 3, No. 303, Lurung 11A, Taman Malihah, Jalai Matang enggau No. 222C, Batu 10, Jalai Kuching-Serian.

Berindik enggau nya, mensia mayuh dipinta nyeliah jelu tupi sida baikka ke udah dituchuk vaksin tauka bedau ari begulai enggau jelu siga lalu matau ulah jelu nya.

Jelu ti bisi ngayanka kelai sakit rabies meseti diripot ngagai Opis Veteriner Sarawak nengah lumur 082-612949 tauka 082-611607 enggau lengkas.

Mensia mayuh mega dilalau nengah Seksyen 37(2) & (3) Ordinan Pengerai Mensia Mayuh 1999, siti penyalah ngelakka ukui lepas sereta mai jelu nya pansut enggau nadai pemendar betulis ari Opis Bekuasa Veterinar Nengeri ari kandang endur sakit Rabies.

Enti ditemu salah tau diukum enda ngelui ari RM5,000 tauka ukum jil enda ngelui tiga bulan tauka kededua.

Naka ke diatu, 22 kes ketup jelu ke baru udah dirikod iya nya di Kuching ngerikod 16 kes, Serian (4), Sarikei (1) enggau Betong (1).