Anda di sini

Jaku niang Pehin Sri Adenan meruan dikeingat rayat Sarawak

KUCHING: Manggai setaun pemidang ex-Kepala Menteri, niang Pehin Sri Adenan Satem ninggalka kitai, tang jaku iya, agi meruan dikeingatka genap rayat Sarawak.

Setaun udah, alai pemidang iya, 11 Januari 2017, kitai di Sarawak lenyau siku orang ke pemadu dibasa, puji kitai, iya nya niang Adenan, lalu kemari kitai lenyau siku ex-Speaker Kunsil Nengeri ti mega ex-menteri menua Sarawak, Tan Sri Celestine Ujang anak Jilan.

“Seharitu, hari ke sinu endar, ke nadai jaku agi deka madahka penyinu ati.

“Kitai semina ulih madahka, arapka seduai iya bela belelak di serega, tang kitai ke ditinggal ditu, nyabak sereta lelengau ke sida ke udah dulu agi ngejang ninggalka kitai,” ku Chairman Opis Kunsil Majlis Perbandaran Kota Samarahan, Datuk Peter Minos.

Iya madah munyi nya nengah penerang ke diberi iya nengah whatsapp ditu, kemari.

Ngenang pasal Adenan, Minos madah niang orang ke mudah dilawa, baik nya ari iya empu tauka nyadi ketuai, orang ke lurus, bendar ati, lalu iya enggau naka ulih ngereja pengawa ke pengabis manah ke rayat sereta Sarawak.

“Lebuh iya ngaga sesebengkah pengawa, iya ngaga pengawa nya enggau pengeranisng ati. Bekau ari pengeransing nya mih, rayat Sarawak chukup sayau ke iya.

“Ke niang Ujang, iya orang ke manah, sereta ngaga pengawa iya enggau naka pemanah. Iya mega dikerinduka rayat sereta bala pangan iya, orang ke enda kala bejaika orang bukai, taja pan dikeduan orang.

“Bansa Dayak kelebih agi deka ngenang iya belama,” ku iya.

Niang Ujang, ti mega kala nyadi Speaker Kunsil Nengeri, ex-Menteri Pengawa Berumah, Kaban Kaunsil Industri Dewan Dagang Dayak sereta ADUN Kemena, Bintulu, midang kena malam Hari Tiga, 10 Januari 2018 dalam urung pukul 7.40 malam, pengudah abis betuchi (ba rumah di Jalai Kedandi Tabuan Jaya).

Urung pukul 6 lemai, niang bisi madahka diri enda nyamai pendiau, alai iya minta urut sida sebilik sebedau ke rebah.

Niang dibai ngagai sepital swasta, KPJ, ditu, alai iya dipadah lutur, udah nadai dalam urung pukul7.40 malam.

Niang ninggalka bini iya, Puan Sri Elizabeth Pawa anak Edwin Ruggis, enggau tiga iku anak indu, Marvina Maria Ujang, Datin Angelina Ujang enggau Dr.Priscilla Midah Ujang.