Anda di sini

Sarawak deka nerima 5.25 juta temuai semanjai taun 2018

Nengah pemayuh penatai temuai tu, risit dagang temuai dalam taun 2018 diperambu manggai ngagai urung RM9.82 bilion

KUCHING: Perambu Opis Menteri Pengawa Dagang Temuai, Seni, Adat Pesaka, Nembiak, Lumba enggau Main taun tu iya nya deka nerima penatai 5.25 juta temuai datai ngagai nengeri tu, lalu nengah penyampau tu risit dagang temuai mega deka manggai urung RM9.82 bilion.

Menteri opis nya, Datuk Abdul Karim Rahman Hamzah madah penyampau nya nambah enti dibanding enggau taun 2017, iya nya naka bulan November 2017, penyampau penatai temuai (ari sukut dagang temuai) ke Sarawak manggai 4.4 juta enggau penyampau risit dagang temuai manggai urung RM8.98 bilion.

Ari penyampau nya, entara taun 2017 enggau 2018, risit dagang temuai, dikearapka deka nyapai 6.9 peratus ba taun tu.

Lalu dalam timpuh ke sebaka nya mega (ari Januari nyentuk November 2017), penambah 6.9  peratus ari risit dagang temuai deka nambah ngagai Pemansut Kasar Asil Dalam Menua (KDNK) ke dipelabaka deka nyapai 8.2 peratus ke taun 2017,” ku Abdul Karim madah lebuh dikerandau Utusan Borneo ditu,kemari.

Ba lansa bukai, Pemangku Ketuai Pemesai Eksekutif Mary Wan Mering madahka produk ke agi diangkatka Sarawak, agi nitihka Perambu Besai Dagang Temuai dalam timpuh panjai ke-2, iya nya ‘Cutural, Adventure, Nature’ (CAN).

CAN agi relevan, sereta nyadi pemerat makit ke Sarawak,” ku Mary.

Ke 2018, strategi dagang temuai deka ngipak polisi nengeri, ke ngangkatka ekonomi digital.

Taja pia, ukai reti kami mutung tauka nginsil mayuh ‘trade fairs’, tang ari sukut teknikal, kos promosyen ulih dikurangka sereta bungkur promosyen ngena digital besai agi ke ulih nyapai tikaas dunya,” ku iya.

Enti kelia ku iya, chara ngaga promosyen, semina nengah manual, alai kos nyelak brosur pan mayuh, lalu nambah enggau nya, ku iya, orang ngambi brosur tang enda entu beratika isi brosur nya, lalu semina nyadi uras ngapa.

Kelia, penguna semina bepanggai ba brosur aja enti sida iya deka ngulihka pemadah, tang orang kemaya hari tu pengawa tu ngena teknologi digital. Dalam timpuh nya mega, kami ulih nyimat kos ngaga promosyen sereta nyelak.

Nya kebuah, muntang, lantang sereta murah agi kos ngaga promosyen ba laman web tauka ngaga pakej,” ku iya.

Ku iya, berindik ari nya, enda ibuh semua ‘Trade Fairs’ dilawa tang sekeda nya agi ulih dilawa kelebih agi lebuh betunga mua enggau prospek (penguna).

Sekeda (Trade fairs) dikurangka, lalu diganti nengah pemisi digital. Ambika chunto, baka ‘MATTA Fair’ digaga 2 taun sekali, pun taun enggau ujung taun. Nyangka ke pun taun, Sarawak ulih ngaga nengah ‘online’ aja, enda ibuh datai ba endur nya empu.

Baka ‘MATTA Fair’ mayuh penguna ke ngelawa pengawa pemandang tu, tang kami deka ngena chara portal ‘online’ ari nurun kediri empu, laban diatu mayuh agi ngena ‘virtual’.

Nya alai, pengawa dagang temuai patut digaga dulu nengah ekonomi digital,” ku iya.

Baka taun 2017, ku Mary, mayuh ari temuai ke ngelawa Sarawak, datai ari menua ASEAN (Singapore, Semenanjung Malaysia, Brunei enggau Indonesia, taja pan makit ari ASEAN tu, penemuai ke pandak lalu risit dagang temuai enda entu mayuh.

Tang menua Eropah agi meruan nyukung kitai, laban orang Eropah enti sida kitu, ungkus dikena sida besai lalu nambah enggau nya, pengelama sida iya ditu pan umbas iya lama,” ku iya.

Baka produk menua tu ke semampai diangkatka iya nya Taman Negara menua tu, agi ba penuduk ke atas.

Lalu baka nya mega, adat pesaka kitai deka di idupka baru. Kami diatu agi benung berandau enggau opis menteri, nganti timbal sida bekait enggau chara lama (tradisional) alai temuai lebuh ngelawa rumah panjai, ukai semina ngelawa aja, tang bemalam, ngasaika peneleba diau di rumah panjai, meda adat pesaka nyengkaum meli produk ari rumah panjai. 

Lalu baka nya mega, lebuh diau di rumah panjai, opis menteri ulih ngelatih anembiak di rumah panjai nya, bakani sida ulih nambah pemisi nengah dagang temuai,” ku iya.

Ku Mary nandu, ari sukut ekonomi, diau enggau komuniti, nadai ngeluarka belanja ti mayuh - bebelika barang ke digaga di rumah panjai, makai pemakai rumah panjai.

Duit ke dibelanja pan naka di rumah panjai aja, enda rua ba duit ke dibai temuai. Enti temuai diau ba endur ke mar, belanja nya besai laban barang mar,” ku iya.

Ba rintai kalendar Dagang Temuai bukai, nyengkaum kunsit ‘Rainforest World Music Festival’ (RWMF) agi mengkan digaga di Sarawak Cultural Village (SCV) tang penyelai iya taun tu, siang hari mayuh agi aktiviti bukai deka digaga di Damai Sentral, kelimpah ari woksyop (siang hari) enggau pengawa beperindang (malam).

Kami agi berunding enggau SEDC enti kami ulih ngena Damai Sentral alai temuai ulih ngaga aktiviti bukai, ngambika peneleba sida iya ukai semina beperindang sereta nyereta woksyop bukai tang agi bisi aktiviti baru,” ku iya.

Lalu baka Festival Jazz agi mengkang digaga di Miri tang semina berengkah ari taun tu, pengerami deka digaga di Hotel Pullman Miri. 

Naka diatu, penyampau hotel 4 ngagai 5 bintang di Sarawak bisi entara 15 nyentuk 20 buah, lalu bisi mega ngembuan ‘homestays’ sereta hotel mit bukai.