KUCHING: Restoran francais McDonald di Batu 3 ditu, diasuh tutup pengelama 14 hari berengkah ari kemari (13 Disember).
Atur nya diterit ketegal pemeresi dalam restoran nya enda nitihka pematut, ke tau mai penusah ngagai pengerai mensia mayuh.
Notis ke ditampal ba mua pintu restoran ke ba Ringkat Baruh, Lot 2719-2720, Block 10, Jalai tun Ahmad Zaidi Adruce mandangka notis ari Opis Menteri Pengerai Malaysia (KKM) ti madahka restoran nya ditutup nengah Seksyen 11, Akta Makanan 1983.
Ba siti ari gambar ke mandangka sampel pengamah restoran nya, mandangka restoran francais nya di tutu indu gerinang.
Direktor Opis Pengerai Sarawak (JKS), Dr. Jamilah Hashim lebuh ditanya pasal pekara tu madahka pengawa meresa ti dipejalaika Opis Pengerai Bagi Menua Kuching (PKBK) endang seruran dipejalaika belama, nya alai ku iya enda tau enda ibuh dipetalatka.
“Lebuh staf ari PKBK meresa premis nya, tikas pemeresi ditemu enda nitihka tikas pemeresi ke ditetap.
“Nengah seksyen nya, notis minta estoran nya ditutup udah dikeluar ngambika pengawa meresi restoran nya enggau silik agi ulih dipejalaika.
“Nangkanka tu ila (tembu timpuh ditutup), PKBK sekali agi deka meresa restoran nya. Enti kami puas ati enggau tikas pemeresi, notis perintah nutup nya tau diturun lalu premis nya tau buka baru,” ku Dr. Jamilah.
Ku iya pengawa meresa belama dipejalai ngambika ulih beratika tikas pemeresi palan bejual pemakai ngagai mensia mayuh.
“Pengawa meresa palan endur makai sigi dipejalaika ke kami belama,ngambika ulih beratika tikas pemeresi pemakai ke awakka enda ngeruga pengerai mensia mayuh,” ku iya.