KUCHING: Perintah nengeri Sarawak deka meri kerejasama sereta sukung ti penuh ngagai nengeri tu enti The United Nations Educational, Scientific and Cultural Organisation (UNESCO) deka ngenukuka Kuching nyadi sebuah ‘Bandaraya Penyerakup’ (Unity City) ti keterubah dalam dunya, ku Kepala Menteri Datuk Patinggi Abang Johari Tun Openg.
“Perintah nengeri Sarawak deka meri kerejasama sereta sukung penuh enti UNESCO deka ngenukuka Kuching nyadi ‘Bandaraya Penyerakup’ (Unity City) ti keterubah dalam dunya tu.
“Lalu baka nya mega, Sarawak mega begunaka sukung sereta kerejasama penuh ari perintah besai betatika pekara tu,” ku Abang Johari madah lalu nandu baru Sarawak deka ngemeratka peminta tu.
Iya madah munyi nya lebuh bejaku ngepunka woksyop ‘Bandaraya Perpaduan’ ti di atur Opis Kaunsil Dewan Bandaraya Kuching Utara (DBKU) enggau Yayasan 1Malaysia, lalu di gulu pemesai kededua buah Opis Kaunsil Bandaraya Kuching Selatan (MBKS) enggau DBKU sereta sekeda pemesai bukai, di Pustaka Negeri Sarawak ditu, kilah ensana.
Abang Johari ti mega nyadi Menteri Pemansang Mengeri enggau Rampa Menua nandu baru madahka, nyapai gelar nyadi sebuah bandaraya penyerakup ukai pekara ke muntang, tang laban di bandaraya Kuching tauka Sarawak, taja ngembuan pupu raban bansa sereta mayuh macham jalai pengarap, ulih diau likun enggau pangan diri.
“Dalam kandang dua taun (kenyau ari 1 Ogos 2015), kitai udah ngaga bemacham pengawa ke meri kelala mengeri kitai tu mengeri ke bepenyerakup lebuh kitai merambu ngaga ‘Taman Perpaduan’ ke nyengkaum perambu strategik di Taman Reservoir, ke bepelasarka mayuh macham adat pesaka sereta jalai pengarap di Sarawak, alai semua utai ke digaga tu, ke pemerat mengeri sereta nengeri tu,” ku iya.
Taja pia, iya madah, pekara bekait enggau penyerakup, ukai pekara ke muntang, lalu enda semua mengeri di dunya tu ulih nyapai tikas ke dijapai Sarawak.
“Pekara bekait enggau penyerakup pedis deka diputar. Di Malaysia pan, enti diperatika adat pesaka sereta penyerakup ke dikembuan kitai ngelama tu, baka ke napi penanggul.
“Tang Sarawak agi mengkang ngembuan penyerakup, enda ngira bansa tauka jalai pengarap. Pekara tu ulih nyadi laban pechayaka pangan diri taja pan bansa kitai enda sebaka, jalai pengarap enda sebaka enggau pangan diri, asal kitai nitih chara tu, kitai nadai napi penanggul dalam ngetanka penyerakup,” ku iya.
Ku iya, di Sarawak, kaul kitai enggau pangan diri tegut, baik nya jalai pengarap kitai sebaka tauka enda, kitai tetap ngembuan runding ti ulih bebatak asur sereta bebasaka jalai pengarap orang bukai.
Abang Johari ti mega nyadi Menteri Wang enggau Perambu Ekonomi mega madahka, orang bukai ke enda teleba meda chara adat kitai ditu, nyangka ngasaika penyerakup di Sarawak ngalitka ati sida.
“Orang ari Semenanjung lebuh sida ngelawa Sarawak, sigi alit ati meda penyerakup ke chukup manah di Sarawak, laban kitai ngembuan kaul manahenggau pangan diri, ke lantang alai gawa, diau, ngujungka Kuching nyadi sebuah mengeri ke lantang,” ku iya.
Nya alai, ku iya, anang nitihka adat orang luar ke seruran charut tauka belaya ketegal bida jalai pengarap tauka pupu bansa.
“Enda ibuh belaya, laban penyarut nya semina muai jam kitai. Putarka penanggul kitai empu, ngangkatka pemisi rayat menua tu, baik nya diau di mengeri tauka menua pesisir, sereta betatika kuing kitai nuju Ekonomi Digital (DE),” ku iya.
Sebedau nya, Chairman Yayasan 1Malaysia, Dr. Chandra Muzaffar dalam jaku iya madahka bandaraya Kuching siti chunto ke chukup manah lalu patut nyadi chunto ngagai mengeri bukai.
Sama bisi enggau ngulu atur pengawa nya kemari, Menteri Pengawa Dagang Temuai, Seni, Adat Pesaka, Nembiak, Lumba enggau Main, Datuk Abdul Karim Rahman Hamzah, enggau Datuk Bandar DBKU, Datuk Abang Abdul Wahap Abang Julai, ADUN Demak Laut, Dr. Hadzland Hipni enggau ADUN Tupong, Fazzrudin Abdul Rahman.