KUCHING: Pengudah Gempuru Likun Tanah NCR ke diatur kena 13 November, SADIA minta perintah ngintu pemaik enggau hak bansa asal kelebih agi ba sentang tanah NCR.
Koordinator gempuru ke mega aktivis SADIA, Peter John madah isu tu ditapi semua peranak Sarawak nyengkaum bansa cina.
“Diatu bisi lebih 400 kes tanah ti benung sereta deka dipechara ba kort.
“Sebedau isu tu majak bebalut sereta enda ulih diintu, kitai minta perintah meratika pemaik bansa asal ngambi tau nyadika kelai pengelurus enggau pemanah perintah,” ku Peter nengah surat penerang berita kemari.
Iya nambah, bansa asal sigi deka nyukung perintah ti manah lalu enda begedika pengari rayat ti amat keran meri servis ngagai rayat.
Kelimpah ari nya ku Peter, bansa asal ukai semina betapi enggau pemar ba isu tanah NCR.
“Bansa asal mega napi sekeda pemar bukai baka ke ba isu tingki enggau batang pengarap,” ku iya.
Ngenang kaul bukai, Sekretari Besai Sadia Nicholas Mujah meri jaku puji ngagai polis ketegal ti udah nyaup ngemujur Gempuru Likun Tanah NCR.
Ku iya, gempuru nya diadu manah lalu nyapai juluk ke ditetap nengah saup polis.
“Urung 3,000 iku orang ari serata Sarawak bisi datai ngulu gempuru di Rumah Kort Lama ditu ke alai gempuru udah dikemujur enggau likun,’ku Nicholas.
Siku agi kordinator gempuru, Bill jugah madah gempuru ke diatur SADIA nya ukai gempuru ungkup tuju politik.
Ku iya, gempuru nya ngelaika pengirau bansa asal sentang isu ke ditapi sida kemaya hari.
“Bansa asal ari genap pupu bansa enggau jalai pengarap begempuru bebala mayuh ngenataika bantah enggau pengirau sentang isu ti balat nekan sida,” ku Bill.