Entara ti dilangkar perintah iya nya pemansang ekonomi digital ungkup pedagang mikro
SIBU: Ba pengawa nentuka pemansang ekonomi kelebih agi ba raban B40 (bepenatai pemisi baruh RM4,000), perintah endang keran bejalaika inisiatif pemansang ekonomi ti belalauka pemansang komuniti.
Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit, Dato Sri Fatimah Abdullah madah siti ari inisiatif perintah iya nya pemansang ekonomi digital ngagai bala pedagang mikro.
“Maya jeman globalisasyen ti bisi penatai internet enggau pengerichah dunya siber, raban ti ditagit patut nyikap diri seruran ngiga chara baru dikena nentuka diri bisi peluang ngulihka belanja enggau nambahka penatai pemisi sida,” ku iya lebuhka bejaku bejadika Program Digital Kenyalang Edisi Sibu ditu, kemari.
Sama bisi datai Menteri Muda Orang Indu, Ruang Bilik enggau Pemansang Anak Mit Rosey Yunus, Sekretari Mendam Opis Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Dr Saadiah Abdul Samat, Direktor Civil Service Delivery Unit Fabian Bigar, Menijar Projek, Perkongsian Strategik e-Usahawan & Outreach Jabatan Pembangunan Tenaga Kerja dan Keusahawanan Digital Perbadanan Ekonomi Digital Perbadanan Ekonomi Digital Malaysia (MDEC) Razin Zaidei sereta bala temuai ke bukai.
Ku Fatimah, program tu dikearap deka ulih ngemansangka modal mensia enggau ngangkatka tikas pengidup rayat di nengeri tu, kelebih agi di bagi menua Sibu.
Program tu mega ku iya nyadi siti ari pengawa perintah meri penyedar enggau nambahka pemereti raban diselinting ba peluang enggau pemaik ti deka diulih ari ekononomi digital.
“Kitai udah nemu dikena ngadaka raban pedagang ti mujur sereta nempa pengaya endang ukai pekara ti muntang enggau senang, tambah mega, tebal agi rayat kitai agi pedis ngemeranka pengawa dagang ba pengidup sida besehari sehari.
“Nya kebuah, dikena nentuka pengawa dagang tu ulih dikemeran dalam runding enggau nyadi pengawa tetiap hari, ke alai perintah begulai enggau ejensi bekaul seruran gawa begulai meri penyedar ngagai raayat pemesai guna pengawa dagang nyadi siti ari chara ti ulih mantu ngangkatka tikas pengidup,” ku Kaban Kunsil Nengeri (ADUN) Dalat madah nyemetak.
Pia mega ku Fatimah, program e-Usahawan enggau e-Rezeki nyadi siti inisiatif opis menteri iya ba pengawa meransang raban diselinting iya nya di baruh raban B40 ngambika ngaul diri dalam sektor dagang enggau kereja digital.
Kenu ku iya, kededua program nya nyadi program ti seruran diatur enggau nagit enam bagi menua di Sarawak kenyau ari bulan September tu tadi.
“Bepelasarka rikot opis menteri, penyampau pedagang mikro 1AZAM di bagi menua Sibu bisi 500 iku. Ari penyampau nya, bisi 160 iku pedagang nya datai ari raban pedagang indu lalu 340 iku pedagang lelaki.
“Bagi Menua Sibu nyadi palan kelima nerima penatai e-Usahawan enggau e-Rezeki pengudah empat bagi menua ke bukai iya nya Kuching, Sri Aman, Miri enggau Limbang ti udah bejalaika program tu.
“Dikearap bala pesereta program tu deka ngerebut peluang ngulihka penatai pemisi tambah,” ku iya nambah.