BINTANGOR: Penyerakup enggau pengerindu begulai enggau pangan diri tampak dipeda ba piak sekula enggau bala apai indai maya Pengerami Lumba enggau Main Gerempung Apai Indai enggau Pengajar (PIBG) Sekula Primari (SK) Tulai 2017, Bintangor, empai lama tu tadi.
Sekula tu bela ngatur Pengerami Lumba Enggau Main 2017 ti dipenyadi Kaban Kunsil Nengeri (ADUN) Meradong Datuk Ding Kuong Hiing, Joseph Hii dulu sehari ari pengerami PIBG nya.
Ba pengerami tu, Joseph bela bisi besemaya deka meri sekula nya geran sepenyampau RM2,000.
Ba hari keterubah, bala apai indai datai bebala mayuh nyukung anak sida ngambi bagi ba pekit ke diatur.
Hari siti, macham bengkah pekit diatur ungkup bala apai indai nembiak baka sukaneka.
Pekit main bol antara apai indai enggau bala pengajar kelimpah pekit karaoke mega bisi diatur ngerichah agi pengerami maya nya.
Sama bela datai maya pengerami tu iya nya Sapit Pemesai Opis Pelajar Pelilih (PPD) Meradong Nassarudin Ibrahim, Kelapa Pengajar Nicholas Renang enggau Chairman Gerempung Apai Indai enggau Pengajar (PIBG) sekula Markus Dagar sereta bala tuai rumah di kandang menua nya.
