KUCHING: Enda nyalahka perintah ti lubah ngemetulka Kod Tanah tang semina minta hak kami diberi pulai baru, ku siku pesereta gempuru likun Tanah Adat (NCR) , Hilarion Besi anak Jinggot.
Hilarion, 67, asal ari Julau, entara beratus iku orang ke nyereta pengawa gempuru likun tanah adat ba tiga bengkah endur kemari, madahka tuju iya enggau gempuru nya laban sinu meda bala orang asal, ke betatika tanah sida iya di serata menua Sarawak, kelebih agi baka ke udah kes-kes ke alah ngetanka tanah adat sida iya.
Hilarion nyemaka kes Tuai Rumah (TR) Jutan, TR Sandah, TR Masa enggau iya empu ku iya, taja pan alah bechara kort tang sida iya tetap ngetanka tanah NCR sida iya, ku iya.
“Tu nyau 15 taun udah bechara ngetanka tanah ke dibeli aku empu di Matang. Aku meli ngena mata duit, enti nunda nadai salah ‘Sales & Purchase’ (S&P) aku nya, nya pan nadai diaku perintah, nya sigi adat kitai bejual bebeli.
“Meda aku meli ngena mata duit, enda tau kini! Mesti ngena tungkus asi. Nama penyalah aku meli ngena mata duit?,” ku Hilarion mantaika enda lantang ati iya, lebuh dirandau ba luar Kort Kuching (endur begempuru likun NCR) ditu, kemari.
Nitih ku cherita Hilarion, tanah NCR sida iya ku iya sigi udah bisi nama ba ‘site plan’ tang direrak Opis Tanah enggau Survei (L&S) lalu diberi ngagai Lembaga Amanah Kebajikan Darul Falah (LAKDF), ke bempu mayuh kompeni baka kebun bedandang besai, ‘holdings’, sereta bisnes bukai.
Ba kes Hilarion, iya madah tanah iya di Matang udah ditukar ngagai nama kompeni LAKDF nya, lalu berindik ari nya, iya empu udah suah nurun-niki kort.
“Tanah aku nya alai kami berumah, nupi chapi, bekebun rian, semua tu agi bedau dia magang-magang. Sida ke nadai kala ngereja semua nya, semina ngena kar/surat selambar lalu bempu ke nya,” ku iya.
Iya mega madahka dalam kandang 15 taun ngetanka tanah NCR nya, nyau beribu duit ke udah abis mayar luyar.
“Laban sida ke bekuasa ngena undang-undang ngerampas tanah, kitai ke seranta tu, ni ka nyadi baka tu.
“Udah 15 taun ngetanka tanah, nyau beribu ke abis, dataika di lengka ke luyar baka nya aja laban enda ulih mayar agi. Dua hari, dua malam aku enda tinduk laban ngatur kes kami nya. Naka pemerinsa...Tang aku pechaya Tuhan deka nulung kami,” ku iya.
Ba kes kort Hilarion tu tadi, defendan keterubah, iya nya State Attorney General ngarika L&S lalu defendan kedua, LKADF.
Taja pia, ku iya, maya kes iya dibai ngagai Kort Besai ditu, iya alah, lalu iya ngapil baru bai ngagai Kort Perintah Besai pan alah.
“Udah tu ila ngarapka perintah ngubah Kod Tanah lalu meri pulai hak kami.
“Nyema perintah enda ulih nukar Kod Tanah, kami diasuh angkat ari tanah kami, kami sigi enda angkat ngapa,” ku iya.