KUCHING: Perintah Nengeri nengah Insiatif Ubah Menua Pesisir (RTI) udah ngemendar 114 projek nyeliah bah ‘Flood Mitigation Projects”(FMP) ti nyendia agih belanja ba penyampau RM100 juta.
Menteri Muda Opis Kunsil Kandang Menua Datu Dr Penguang Manggil madah ari semua nya, 97 projek ti begunaka belanja RM45.78 juta udah dipejalai ba taun tu.
“Disadang 63 projek deka tembu digaga taun tu lalu laluh ke bukai deka digaga taun 2018.
“Semua projek tu dikereja Opis Kunsil, Opis Parit enggau Entali Ai (DID) enggau Opis Kereja Raya(JKR),’ku iya ba aum pengarang berita di komplek DUN ditu, kemari.
Dulu agi ari nya rambau aum, iya nyaut tanya ADUN BN-Batu Kitang Lo Khere Chiang sentang pekara ke sama.
Iya mega madah nengah Projek Ubah Menua Pesisir(RTP), penyampau 115 projek ke bekaul enggau FMP nengah agih belanja RM25.04 juta udah mega dikemendar lalu deka dikereja DID enggau opis kunsil.
“Nambahka nya, Opis Menteri Pengintu Pengelantang, Pengawa Berumah enggau Kunsil Kandang Nengeri ba taun tu bisi nyendia RM7.02 ngagai opis kunsil di nengeri tu dikena ngemujur projek nyeliah bah.
“Opis Menteri Pengeraja Asal enggau Rampa Menua mega bisi ngagihka RM27.55 juta ngagai DID ungkup tuju ke sama,’ku Penguang.
Ba sentang tanya ADUN BN-Batu Kitang, Penguang madah kereja ngemanah parit enggau ‘concrete culvert’ ba Jalai Datuk Amar Kalong Ningkan sereta Jalai Datuk Tawi Sli udah dikemendar nengah RTI KR7.
Ku iya, projek nya sedia dikeluar tinda ba suku ketiga taun 2018.