JULAU: Semina siku aja dikemendar sereta diaku nyadi ketuai tauka “Tuai Rumah” ungkup siti rumah rumah panjai.
Kaban Parlimen Julau, Datuk Joseph Salang madah, chukup sinu lebuh berati bisi lebih ari siku orang minta penuduk ke sebaka.
Ku iya, tu kebendar tau ngeruga penyerakup, pengelantang enggau kaul sida dalam rumah panjai nya.
“Kami bisi ninga insiden rumah panjai pechah dua lebuh sida serumah nyelapat dinding ruai enggau kaki lima dikena ngelai diri enda betampil enggau raban penyukung ke bukai.
“Ulah baka tu patut diketu,”ku iya ba sebengkah pengerami ke diatur ditu ensanus.
Nitihku Salang, sida tauka orang ti bisi juluk deka nyadi ketuai patut bisi sukung ari rayat kelimpah diaku Penghulu enggau Opis Kunsil ba sitak diri.
“Pemutus kepenudi pasal nyiri tuai rumah deka diputuska Pemesai Opis Kunsil.
“Nyema kitai nyiri diri empu nyadi Tuai Rumah nadai pemendar nyadi penuduk nya enda sah sereta enda ulih nerima elawin ninting bulan,” ku iya.
Ku iya, semina sida ke beamai-amai bisi penau, bagas sereta dikerindu rayat ulih diperunding nyadi tuai rumah.
“Kitai bisi tuai rumah ti semina dekaka gelar tang nadai pengeransing deka ngereja tanggungpengawa ke udah diberi.
“Kelimpah nya, kitai mega bisi tuai rumah ti nulak agenda diri empu dalam semua pekara enggau belanja ke diberi perintah ke pemaik nembiak redak iya,” ku iya.
Salang madah enda ibuh belaya ke penuduk tuai rumah nya.
Nama utai ke lebih beguna iya nya sukung tuai rumah ke dipilih ke pemaik semua piak enggau semua kita serumah.