Anda di sini

Karim deka nyaup mutarka penanggul ke nyadi dalam FAS

Advertisement

KUCHING: Menteri Dagang Temuai, Seni, Adat, Nembiak, Lumba enggau Main, Datuk Abdul Karim Rahman Hamzah dipelaba deka meri jaku lalau gagai Gerempung Main Bol Sarawak (FAS) ke napi penanggul entara sida ke mangku pengawa ba FAS (komiti lama) enggau komiti baru.

Iya madah penanggul sereta penyarut ke nyadi dalam FAS, enda tau enda diputar enggau jampat, enggau chara kededua piak, komiti lama enggau baru.

Enti kitai bisi meda penanggul ke nyadi nya enda berapa manah dipeda (dalam gerempung), seruran besalahka pangan diri, sereta penyarut bukai enda manah dipeda orang bukai.

Aku empu agi beratika pekara nya lalu agi nasat penanggul ke nyadi, dini endur ilap nya,” ku Abdul Karim madah lebuh dikerandau ba aum media Minggu Mutosikal Bekuasa Besai Entarabansa Kuching 2017 di opis menteri nya di Begunan Baitulmakmur ditu, kemari.

Iya mega ngarapka sida ke mangku pengawa nyadi komiti baru dalam FAS, ke diatu, dipinta besabar dulu, lalu enda ibuh nganu komiti lama, bekait enggau penanggul ke nyadi nya.

Lebuh kitai ngambi endur pangku pengawa gerempung tauka serakup, kitai nerima pengawa ke ditinggal ulih sida ke dulu agi, ke dikarapka kala mangku pengawa nya. Nya alai, enda ibuh meh madahka semua ilap kediatu nyadi ketegal komiti sebedau tu.

Tu ukai chara ke manah, chara kitai ngemutar patut digaga enggau manah…Enti nadai duit pan, peratika dulu ni bagi pengawa ke patut digaga dulu, lalu baka nya mega, enti bisi penanggul pasal ripot ke enda diaudit, anjung meh ripot nya di audit,” ku iya.

FAS diatu napi penanggul minta lisin ngambika ulih bepekit enggau ‘Liga Super’ musim baru tu ila, pengudah suah endar ngapil ngagai Football Malaysia Limited Liability Partnership (FMLLP) enda diterima laban bedau nerima ripot wang ke udah di audit.

Ketegal nya, ngujungka opis FAS ke dipejalai ulih komiti baru betuaika Datuk Posa Majais, madahka penanggul nya bepun ari komiti lama betuaika Datuk Surdasono Osman.

Nitih ku Posa, FMLLP begunaka FAS nganjung ripot wang sida iya ke timpuh 2012 ngagai 2016, alai ba timpuh nya, gerempung nya dipegai  FASFMG Sdn Bhd, ke ditumbuhka Sudarsono.

Advertisement