Anda di sini

PH pechaya ulih menang ba empat penuduk maya PRU14

Advertisement

KUCHING: Pakatan Harapan (PH) Sarawak chukup pechaya ulih menang ba empat penuduk parlimen ba pengawa Bepilih Besai Ke-14(PRU14) tu ila iya nya nambah enam penuduk ke udah dikuasa PH.

Chairman PH Sarawak, Chong Chieng Jen mansutka pekara tu nimbal tuduh Sekretari Besai Barisan Nasional(BN) Dato Sri Dr. Stephen Rundi.

Dr. Rundi bedau lama tu tadi madah BN ulih ngerampas empat penuduk parlimen ke dikuasa penyakal.

“Kitai(PH) meda peluang menang ba empat penuduk, nambah enam penuduk parlimen ke udah dikuasa penyakal diatu.

“Empat penuduk nya ngarika penuduk di menua pesisir sereta entara kandang mengeri enggau kandang menua pesisir.

“Rundi nemu empat penuduk ke disebut aku ke alai BN disadang alah. Tanya iya(Rundi),”ku Chong ba aum pengarang berita PH ke diatur di Indu Opis DAP ditu kemari.

Chong ke mega Chairman DAP Sarawak nambah, PH deka majak tegap serak tu ketegal Adenan udah enda nguluka BN agi.

Ku iya, Chairman BN Nengeri Datuk Patinggi Abang Johari Tun Openg enda kering baka Adenan.

“Adenan meri pengarap ngagai rayat tang Abang Johari mai pengirau ngagai rayat.

“Polisi, tusun merintah enggau program ke dituku Abang Johari enda ngena, enda mulaika pemaik,’ku Chong.

Dalam timpuh lima taun pengudah PRU13 ke alai BN megai kuasa ku Chong nambah, pengidup rayat majak merinsa.

Ku iya, ungkus beridup diatu majak tinggi sereta ulah makai suap majak nyadi ba ejensi enggau ketuai perintah.

Bela datai Ketuai bagi Pemadah PH Sarawak Vernon Kedit enggau ADUN Pending Violet Yong.

Advertisement