Anda di sini

Muzium Lama Sarawak deka dikemanah enggau lengkas

Advertisement
 Abang Johari dalam aum pengarang berita madahka projek ngemanahka baru bangunan muzium lama nya begunaka belanja sepenyampau RM38 juta, seraya diperatika (ari kanan) Ik, Lee enggau (kiba) Ipoi.
AUM PENGARANG BERITA: Abang Johari dalam aum pengarang berita madahka projek ngemanahka baru bangunan muzium lama nya begunaka belanja sepenyampau RM38 juta, seraya diperatika (ari kanan) Ik, Lee enggau (kiba) Ipoi.

KUCHING: Perintah nengeri ngungkupka belanja sepen­yampau RM38 juta dikena bejalaika projek ngemanahka Muzium Lama Sarawak.Kepala Menteri, Datuk Patinggi Abang Johari Tun Openg madah, berindik ari nya perintah nengah Opis Muzium Sarawak (JMS) deka nutup muzium lama laban begunan besejarah nya patut dikema­nahka enggau lengkas.

Muzium lama nya deka di­tutup sementara dalam timpuh urung 30 bulan, berengkah 23 Oktober 2017 ngagai pun taun 2020.

“Muzium lama nya begunan besejarah tambah mega begu­nan nya udah tuai tang sebagi ari proses tauka pengawa kitai deka ngemanahka begunan nya, nya alai muzium lama nya enda dibuka ngagai mensia mayuh.

“Kitai deka mindahka semua barang lama tauka besejarah ari muzium lama nya ngambika disimpan enggau dijaga, lalu berebak enggau tu kitai nge­manahka begunan lama nya.

“Kitai deka nganti ke udah buruk tang struktur begunan nya agi nitihka asal (begunan nya).,” ku iya ngarapka mensia mayuh ulih beratika pengawa nutup muzium nya.

Abang Johari mansutka pekara nya dalam aum pen­garang berita bekaul enggau muzium lama nya deka di­tutup, ti diatur ba opis iya di Wisma Bapa Malaysia, ditu, kemari.

Begunan besejarah nya di­gaga Sir Charles Brooke dalam taun 1891 beduduk ari per­ambu penemu Alfred Russel Wallace, patut dikemanahka enggau lengkas nyengkaum ngemanahka fizikal begunan, wayar elekterik enggau nge­manahka servis.

Bepelasarka statistik temuai ke datai ngagai muzium nya, apin lama ke udah bisi urung 400,000 iku temuai datai nga­gai muzium nya.

Pengawa nutup muzium lama nya senipak enggau pengawa ke dipejalaika JMS ti bejalaika projek Kampus Muzium Sarawak enggau Jejak Warisan Fasa 2.

“Kitai ngarapka kampus muzium nya deka tembu niti­hka timpuh ke udah ditetap, tang ke diatu bejalai enggau lanchar,” ku iya seraya ma­dahka deka bisi sukut dalam kampus muzium ila diberi nama Ali.

Sama datai ba aum pengarang berita nya kemari , Menteri Muda Dagang Temuai, Seni enggau Main Asal Datuk Lee Kim Shin, Sekretari Mendam Opis Menteri Dagang Temuai, Seni, Main Asal enggau Lumba enggau Main Datu Ik Pahon enggau Direktor JMS, Ipoi Datan.

  • oleh
  • Advertisement