SIBU: Opis Insolvensi ngarap ‘Rang Undang-Undang Kebankrapan (Pindaan)’ 2016 deka meri atur ke adil ngagai semua ke bekaul nyengkaum pemiutang, pengutang enggau penjamin bankrap sereta piak opis pengudah atur nya diterit.
Ketuai Opis Insolvensi Malaysia Pampang Sibu Idlen Ibus madah, Opis Insolvensi nadai nyebut sapa-sapa bankrap.
“Orang ke bankrap iya nya sida ke dudah berutang lalu disebut bankrap bepelasarka Perintah Adjudikasi ke digaga Kort Tinggi ngagai orang ke berutang nyema iya enda ulih mayar utang pemadu mimit RM30,000.
“Kebendar, tanggungpengawa Opis Insolvensi iya nya ngatur kes bankrap, mega mantu orang ke bankrap lepau ari bankrap,” ku iya.
Iya madah rambau Program Taklimat Rang Undang-Undang Bankrap (Ubah) 2016 ke diatur ba Dewan Sibu Kompleks Islam Sarawak ensanus.
Sama bisi datai iya nya Pemesai MDI Pampang Sibu Suria Senen enggau Jennifer Melian.
Bisi 80 pengari mayuh opis enggau ejensi perintah, palan wang enggau gerempung ukai perintah ditu ngulu program penerang enggau randau pengelama setengah hari nya.
Penerang nya diatur beserimbai enggau pengerami Bulan Merdeka Menua Ke-60 lalu ngemeratka lapan ubah polisi ke digaga bekaul enggau akta ke diatu iya nya Akta Kebankrapan 1967 (Akta 360).
Entara nya nagang ngukum bankrap ngagai penjamin rama lalu ngenikika penyampau bankrap iya nya ari RM30,000 ngagai RM50,000.
“Kami ngarap undang-undang ke udah diubah nya ulih ngurangka penyampau orang bankrap laban penyampau nya empat kali lipat ari RM1,000 ba 1967 ngagai RM50,000 ba 2016,” ku iya.
“Nya alai, tu lebih tinggi dibanding enggau menua maju baka Singapura (RM46,472.71), United Kingdom (RM27,255.78), tang lebih baruh ari Amerika Syarikat (RM69,646.63), tang jauh lebih baru ari Thailand (RM124,366.20),” ku iya.
Iya madah, penerang silik pasal undang-undang baru ulih betelefon terus nuju opis MDI ditu.