Anda di sini

Rayat deka ngasai arus internet ke deras agi dalam timpuh dua taun agi

Advertisement

KUCHING: Rayat nengeri tu dalam timpuh dua taun ti deka datai, dipelabaka ulih ngasaika peneras arus internet 4 Terabit sesikin.

Kepala Menteri, Datuk Patinggi Abang Johari Tun Openg madahka, nya berindik ari perintah nengeri ke amat chakah deka ngangkatka pemanah infrastruktur internet di nengeri tu sereta bejalaika inisiatif ngungkupka belanja sereta minta saup belanja ari perintah besai dikena nyapai juluk nya.

Baka ti kala disebut sebedau tu ku iya, perintah nengeri ngambi inisiatif ngungkupka belanja sepenyampau RM1 bilion dikena ngangkatka pemanah enggau peneras arus internet di nengeri tu.

“Peneras (arus internet) dipelabaka ulih diasaik dua taun ke deka datai.

“Laban pengudah Sarawak Multimedia Authority (SMA) kitai ngarapka dikemendarka Kunsil Nengeri bulan November tu, lalu udah nya kitai bejalaika atur nangkanka nya.

“Perintah Sarawak amat bebendar sereta chakah pasal tu, baka ti kala dipadahka sebedau tu, kitai ngungkupka belanja dikena ngaga tu (ngangkatka peneras arus internet) lalu berebak enggau tu kitai deka bekerejasama enggau perintah besai ngambika sama besaup nyendiaka kitai ungkup belanja dikena ngangkatka infrastruktur tu,” ku iya.

Abang Johari ti mega Menteri Wang enggau Perambu Ekonomi mansutka pekara nya dalam aum pengarang berita, pengudah ke betemu sereta berandau enggau bala ketuai dagang enggau industri bekaul enggau inisiatif ekonomi Digital Perintah Sarawak, ke diatur ba Tingkat 2, Wisma Bapa Malaysia ditu, kemari.

Dikena nyapai juluk nya mega perintah nengeri ngambi inisiatif sereta nguluka pengawa ngemansangka peneras infrastruktur internet, iya madahka perintah nengeri deka numbuhka ‘gateway enggau ‘backhaul’ ti dipejalaika enggau kerejasama menua Indonesia enggau Brunei.

“Pekara tu benung dikerandau sereta diperundingka,” ku iya seraya madahka nya mega entara pekara ti ditanya sereta dikerandauka enggau bala ketuai dagang enggau industri kemari.

Lebuh ke ngenang pekara ti bekaul engga nya,  Abang Johari madahka takah entara menua pesisir enggau mengeri ulih dikurangka nengah ekonomi digital, nyema infrastruktur intenet dikemanahka agi.

Nyema mensia mayuh bepalan di menua pesisir baka di Betong bisi Bukit Sadok (agropolitan), di Sarikei (halal hub) enggau ke bukai, lalu udah tentu kitai ngangkatka peneras arus internet ba endur nya, ku iya.

“Enti pemayuh tubuh mensia mayuh di menua ulu tauka menua pesisir nambah enggau jampat, kitai patut ngiga chara bukai, bakani kitai ulih nyambungka sida (menua ulu) enggau kitai (di mengeri),” ku iya seraya madahka deka ngiga beberap model ari menua China ke senipak sereta ditelandan di kandang menua ulu di nengeri tu.

Kelimpah ari nya peneras arus intenet amat beguna, laban kitai  ulih nyendiaka servis ngena internet lebih agi rebak baru tauka orang biak ke chukup bepengelandik.

“Raban biak kitai amat bepengelandik lalu sida iya uih ngasilka produk sida ngena aplikasi sida empu baka produk ke enda dipeda, produk ti bisi kretiviti sereta inovasi.

“Nya kebuh kitai numbuhka hub inovasi ba Kuching di i-Com Square sereta dua hari ke udah kitai bejadika hub ke sama di Sarikei sereta deka dibuka ba palan bukai nyengkaum di Betong, Bintulu, Miri sereta Limbang sereta Lawas.

“Lalu hub nya ulih besambung enggau Kampung Digital kitai. Kampung Digital tu ungkup orang dagang ke nyulut ba pengawa dagang sereta ulih nempa kaul tauka ngerembaika asil ngagai market dunya,” ku iya.

Sama bisi dalam aum penrang berita nya kemari, Sapit Kepala Menteri iya nya Datuk Amar Douglas Uggah embas enggau Datuk Amar Awang Tengah Ali Hassan; Sekretari Perintah Nengeri Tan Sri Datuk Amar Mohamad Morshidi Abdul Ghani; Menteri Wang Kedua Dato Sri Wong Soon Koh; Menteri Muda E-dagang Datuk Mohd Naroden Majais enggau ke bukai.

Advertisement