KAPIT: Penatai Kaban Kunsil Nengeri Bukit Goram Jamit Jefferson Unyat enggau Sapit Menteri Pemansang Menua Peisisr enggau Kandang Menua Malaysia, Datuk Alexander Nanta Linggi enggau raban iya udah nerima sambut ke manah ati lima buah rumah panjai lebuh ngulu pengerami ‘Ketuai Begulai enggau Rayat’ ke diatur JASA enggau PBB Kapit di Rumah Seliong, Sungai Belawai ditu.
Mensia mayuh ke bisi ngulu pengerami nya ari Rumah Seliong, Rumah Gelu, Rumah Madau, Rumah Mamat enggau Rumah Jabang.
Kelimpah ari peranak ari rumah panjai ke besemak baka ari Rumah Nuga, Rumah Pioh, Rumah Marung, Rumah Nuing, Rumah Layang, Rumah Rengga, Rumah Lugan, Rumah Semada, Rumah Ramtai enggau Rumah Lugom mega bela bisi datai.
Ku Nanta, tuju penemuai sida seraban laban deka ngabas projek ti digaga di semanjai Sungai Belawai seraya begulai enggau rayat dia.
Ku iya, pemujur kunteriktor udah ngaga projek nya enggau manah.Enti projek nya enda digaga memanah, rayat deka rugi laban projek nya endang ke pemaik rayat.
“Aku enggai meda projek nya enda digaga manah nitihka standard ditetap kunteriktor, laban nya tau ngerugi rayat. Semua projek sekalika besai tauka mit sigi ke pemaik rayat. Ninting taunba sitak Parlimen Kapit, lebih 360 projek digaga. Sehari tu, kami duai Jamit datai ngabas projek ke digaga di Sungai Belawai”, ku Nanta
Ku iy a baru, kenyau ari taun 2014 nyentuk 2017 udah mayuh bengkah projek dipejalaika ba mayuh bengkah rumah panjai semanjai Sungai Belawai ditu. Projek nya beungkus lebih ari RM 3 million.
Lebuh ke datai dulu ari nya, Nanta udah meresa projek ngemanahka jalai batu sepenyauh satu kilometer ari jalai batu ngagai jalai tar ke nyambung Rumah Seliong ngagai jalai kayu batang ke baru tembu bedau lama udah.
Projek bukai ti dipejalaika iya ngaga jematan besi, palan penyangkai perau besi, lurung bedarat, ‘bantu berumah rayat’, ‘e-kasih’, ‘ngerata palan endur ngaga rumah panjai baru enggau ke bukai.
Iya mega madah, semua rumah panjai semanjai Sungai Belawai jemah ila deka disambung karan 24 jam nengah Grip Nengeri (SEB). Jalai kompeni kayu batang ke diatu ari Nangai Belawai ke ulu kin mega deka dikemanah lalu tiang karan mega deka didirika. Semua projek nya beungkus bemilion ringgit dikena ngangkatka tikas pengidup rayat di menua pesisir”, ku Nanta
Ba pengerami nya, Nanta udah ngungkupka tetiap buah umah panjai semanjai Sungai Belawai (Rumah Nuing, Rumah Marung, Rumah Pioh, Rumah Nuga, Rumah Leyang, Rumah Rengga, Rumah Madau, Rumah Gelu, Rumah Mamat, Rumah Jabang, Rumah Lugan, Rumah Seliong, Rumah Semada, Rumah Rantai enggau Rumah Lugom) sBiro Indu sama bela nerima RM 6,000 dikena ngatur aktiviti. Ku iya, ari penyampau RM 6,000 nya, RM 3,000 ari iya empu lalu RM 3,000 agi ari Jamit.
Bela bisi ngulu pengerami nya Senior Sekretari Pribit apit Kepala Menteri, Sylvester InsorLingan, Sekretari Politik Kepala Menteri Tapah Ata, D.O Kapit Elvis Didit, Superintenden Opis Tanah enggau Survei Kapit JawanTumba, Pemesai Opis JASA Mohd Matan Yok, Cr George Tang, Temenggong Wilfred Billy Panyau, Pemancha Enggin Nyipa, Penghulu Pasang Tubah enggau bala Tuai Rumah.